សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ មានករណីគ្រោះអគ្គិភ័យមួយបានឆាបឆេះនៅក្នុងវិទ្យាស្ថានSerum របស់ឥណ្ឌាដែលរោងចងក្រផលិតវ៉ាក់សាំងដ៏ធំជាងគេបំផុតនៅក្នុងពិភពលោក បណ្ដាលឲ្យមនុស្សយ៉ាងហោចណាស់ ៥នាក់ បានបាត់បង់ជីវិតក្នុងភ្លេីង។ ប៉ុន្តែអគ្គិភ័យនេះ មិនធ្វើឱ្យប៉ះពាល់ដល់ការផលិតវ៉ាក់សាំងនោះឡើយ។
ជាក់ស្តែងបើតាមការចុះផ្សាយរបស់ទីភ្នាក់ងារព័ត៌មាន AP បាននិយាយថា អគ្គិភ័យខាងលេីនេះ បានកើតឡើងនៅថ្ងៃទី២១ ខែមករាឆ្នាំ២០២១ម្សិលមិញនេះ ក្នុងអគារមួយ ដែលស្ថិតនៅក្រោមការសាងសង់ក្នុងវិទ្យាស្ថាន Serum។ ខណៈមនុស្សចំនួន ៤នាក់ ត្រូវបានជម្លៀសចេញពីអគ្គិភ័យ ចំណែកមនុស្សចំនួន ៥នាក់ បានស្លាប់នៅក្នុងឧបទ្ទវហេតុនេះ។បន្ទាប់ពីហេតុការណ៍នេះកើតឡើង ក្រុមហ៊ុននេះបញ្ជាក់ថា អគ្គិភ័យ មិនបានបង្កឱ្យមានការប៉ះពាល់ដល់ផលិតកម្មនៃវ៉ាក់សាំងកូវីដ-១៩ ឡើយ។
ទាក់ទិននឹងករណីខាងលើនេះ ភ្លាមៗនាយករដ្ឋមន្ត្រីឥណ្ឌា លោក នារិន្ទ្រា ម៉ូឌី បានថ្លែងសាររំលែកទុក្ខដល់អ្នកបាត់បង់ជីវិត និងជូនពរឱ្យអ្នករងរបួសឆាប់ជាសះស្បើយ។ ជាមួយគ្នានេះ ប្រធានប្រតិបត្តិវិទ្យាស្ថាន Serum ក៏បានចូលរួមរំលែកទុក្ខអ្នកស្លាប់ផងដែរ។
បើតាមការអះអាងពីប៉ូលិសក្រុង Pune រដ្ឋ Maharashtra បានបញ្ជាក់ថាអ្នកស្លាប់ទាំង ៥នាក់រូបនេះ គឺជាបុគ្គលិកធ្វើការនៅក្នុងក្រុមហ៊ុនSuvidha Engineers ដែលជាក្រុមហ៊ុនបំពាក់ម៉ាស៊ីនត្រជាក់ឱ្យក្រុមហ៊ុនឱសថនេះ។ចំណែកមូលហេតុ ដែលបង្កឱ្យមានភ្លើងឆេះ និងទំហំនៃការខូតខាត អាជ្ញាធរមិនទាន់អាចបញ្ជាក់បាននៅឡើយទេ ខណៈប៉ូលិស កំពុងប្រមូលព័ត៌មានលម្អិត។
សូមជម្រាបថា វិទ្យាស្ថាន Serum គឺជាក្រុមហ៊ុនផលិតវ៉ាក់សាំងដ៏ធំជាងគេរបស់ពិភពលោក។ ក្រុមហ៊ុន បានចុះកុងត្រាជាមួយក្រុមហ៊ុនAstraZeneca ក្នុងការផលិតវ៉ាក់សាំងប្រឆាំងកូវីដ-១៩ ចំនួន១ពាន់លានដូស។ ក្រុមហ៊ុនអាចផលិតវ៉ាក់សាំងកូវីដ-១៩ ដែលត្រូវបានដាក់យីហោថា «COVISHIELD» បាន៥០លានដូស ក្នុងមួយខែៗ។ ក្នុងបរិបទកូវីដ-១៩ ប្រទេសជាច្រើន បានពឹងផ្អែកលើវិទ្យាស្ថានមួយនេះ ក្នុងការទទួលបានវ៉ាក់សាំងប្រឆាំងកូវីដ-១៩ ដើម្បីចាក់ឱ្យប្រជាជនរបស់ខ្លួន។
ក្រុមហ៊ុននេះ និង AstraZeneca បានចុះកិច្ចព្រមព្រៀងជាមួយកម្មវិធីCOVAX ដែលស្ថិតក្រោមការដឹកនាំរបស់អង្គការសុខភាពពិភពលោកនិងសម្ព័ន្ធមិត្តវ៉ាក់សាំង ប្រមាណ ៤០០លានដូស។ ទន្ទឹមនេះ ឥណ្ឌា បានចាប់ផ្តើមនាំចេញវ៉ាក់សាំង ក្រោមការផ្តល់ជាជំនួយទៅឱ្យប្រទេសជិតខាងដូចជាប៊ូតង់ ម៉ាល់ឌី បង់ក្លាដែស នេប៉ាល់ មីយ៉ាន់ម៉ា និងសីស្ហែល។
គួរបញ្ជាក់ថា នៅថ្ងៃទី២២ ខែមករានេះ ក្រោមការផលិតរបស់វិទ្យាស្ថានSerum ឥណ្ឌា បានចាប់ផ្តើមនាំចេញបែបពាណិជ្ជកម្មលើវ៉ាក់សាំងប្រឆាំងកូវីដ-១៩ ជាលើកដំបូងទៅប្រេស៊ីល និងម៉ារ៉ុក៕ដោយ៖ស តារា
រូបភាព៖ ( The Indian Express Photo)
