សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បើយោងតាមការបង្ហោះហ្វេសប៊ុកផ្លូវការរបស់លោក ដួង តារា ជំនួយការសម្តេចតេជោ ហ៊ុន សែន នាយករដ្ឋមន្រ្តី និងជារដ្ឋលេខាធិការទីស្តីការគណៈរដ្ឋមន្រ្តី នៅរសៀលថ្ងៃអង្គារទី២ ខែមីនា ឆ្នាំ២០២១នេះថា ករណីទំនាស់ដីផ្លូវចូលទៅកាន់ផ្ទះមីង អ៊ិត សៀក អាយុ៦២ឆ្នាំ ជាមួយអ្នកជិតខាងមួយគ្រួសារដ៏រាំរ៉ៃដែលមានរយៈពេលជាង១០ឆ្នាំមកនេះ(ស្ថិតនៅភូមិក្រពើហារ សង្កាត់ព្រែកឫស្សី ក្រុងតាខ្មៅ ខេត្តកណ្តាល) ដែលតុលាការកំពូលបានកាត់ក្តីឲ្យអ្នកមីង អ៊ិត សៀក ឈ្នះក៏ដោយ ក៏ប៉ុន្តែអាជ្ញាសាលាបានចុះអនុវត្តន៍៤ដងមកហើយ ក៏ប៉ុន្តែមិនបានសម្រេច (?- លើកទី៤កាលពីថ្ងៃទី ៥កុម្ភៈ ២០២១)។
លោក ដួង តារា បន្តថា ចុងក្រោយ គឺអាជ្ញាសាលាបានសម្របសម្រួលភាគីទាំងពីរ ហេីយបានសុំឲ្យភាគីឈ្នះក្តីមីង អ៊ិត សៀក ផ្តិតមេដៃសន្យាបង់លុយចំនួន $4,000 ដុល្លារ ទៅឲ្យភាគីចាញ់ក្តី ដើម្បីអនុវត្តន៍បើកផ្លូវដេីម្បីបញ្ចប់រឿង។ ដោយសារមីង អ៊ិត សៀក ក្រីក្រ មានមុខរបរជាអ្នកលក់នំប៉័ង និងតៅហ៊ូទឹកសណ្តែក ពុំមានថវិកាគ្រប់ដេីម្បីបង់ទៅឲ្យភាគីចាញ់ក្តី ទើបខ្ញុំសម្រេចចិត្តសុំជំនួយពីបងប្អូនដេីម្បីជួយដល់គាត់។
លោក ដួង តារា បន្ថែមទៀតថា អរគុណខ្លាំងណាស់ចំពោះទឹកចិត្តបងប្អូន “ខ្មែរជួយខ្មែរ”។ ខ្ញុំបានទទួលថវិកា $4,000 ហើយបានប្រគល់ជូនទៅមីង អ៊ិត សៀក កាលពីថ្ងៃទី ១ កុម្ភៈ រួចហើយ។ បើលោកអាជ្ញាសាលាអនុវត្តន៍លើកទី ៥នេះដោយមិនចាំបាច់ចំណាយថវិកា នោះប្រាក់ $4,000 នេះនឹងក្លាយជាដើមទុនទុកសម្រាប់រកស៊ីចិញ្ចឹមក្រពះរបស់មីង អ៊ិត សៀក ដែលជាភាគីឈ្នះក្តីពីតុលាការកំពូល។
ខ្ញុំក៏មានជំនឿដែរថា ភាគីម្ខាងទៀត (ជាម្ចាស់ដីដែលបានលក់អោយមីង អ៊ិត សៀក ដែលកំពុងរស់នៅជាប់របងផ្ទះនឹងគ្នា) មិនតវ៉ាបំពានច្បាប់តទៅទៀតទេ ជាពិសេសទៀតនោះ ខ្ញុំមានជំនឿយ៉ាងមុតមាំលើសមត្ថភាពអាជ្ញាសាលាដែលនឹងចុះមកអនុវត្តជាលើកទី៥ នៅក្នុងសប្តាហ៍ក្រោយនេះ។
ខ្ញុំបាននិយាយលួងលោម មីង អ៊ិត សៀក និងក្រុមគ្រួសារកុំអោយយំតូចចិត្ត ប៉ុន្តែបានប្រាប់គាត់ថា ពេលនេះមីងមានប្រាក់គ្រប់ចំនួន $4,000 ក្នុងដៃហេីយសម្រាប់ចំណាយទៅអោយភាគីអ្នកចាញ់ក្តី ហើយ សង្ឃឹមថាមីងនឹងមានផ្លូវចេញពីផ្ទះមកថ្នល់ក្នុងពេលដ៏ខ្លីនេះជាមិនខាន៕
ជាចុងក្រោយ លោក ដួង តារា យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕
ដោយ៖ស តារា
