សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដោយសារកត្តាមនុស្សខ្វះការប្រុងប្រយ័ត្ន បានផ្សារដែកធ្លាក់កម្ទេចបង្កជាអគ្គិភ័យឆាបឆេះអគារមន្ទីរសម្រាកព្យាបាលនិងសម្ភពយីហោ ឈាង សេង យ៉ាងសន្ធោសន្ធៅ នៅក្នុងបន្ទប់ជាន់ទី២។
ហេតុការណ៍នេះកើតឡើងកាលពីវេលាម៉ោង ៣រសៀល ថ្ងៃទី៨ ខែមីនា ឆ្នាំ២០២១ នៅចំណុចផ្ទះលេខ៣ តាមបណ្តោយផ្លូវ86K ក្រុម៩ ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឱ្យដឹងថា ម្ចាស់ផ្ទះ ឈ្មោះ កិត អរ៉ាឌី ភេទស្រី អាយុ ៤០ឆ្នាំ ជនជាតិខ្មែរ មានមុខរបរជាអាជីវករ។
តាមប្រភពព័ត៌មាននៅកន្លែងកើតហេតុបានប្រាប់ឱ្យដឹងថា មុនពេលកើតហេតុ ជាងបានមកផ្សារដែកជួសជុលក្នុងបន្ទប់ ជាន់ទី២ ហើយដោយខ្វះការប្រុងប្រយ័ត្ន ធ្វើឱ្យធ្លាក់កម្ទេចភ្លើងបង្កជាអគ្គិភ័យឆាបឆេះ រហូតទប់ស្កាត់មិនជាប់ ក៏រាយការណ៍ទៅកម្លាំងសមត្ថកិច្ចមូលដ្ឋានដើម្បីទំនាក់ទំនងទៅកម្លាំងជំនាញ នៃការិយាល័យបង្ការ និងសង្គ្រោះ ពន្លត់អគ្គិភ័យចេញរថយន្តមកជួយធ្វើអន្តរាគមន៍ភ្លាមៗ។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ឱ្យដឹងថា ក្រោយពីទទួលបានព័ត៌មានពីប្រជាពលរដ្ឋភ្លាម លោកក៏បានបញ្ចេញរថយន្តពន្លត់អគ្គិភ័យរបស់ការិយាល័យ៣គ្រឿងចេញមកធ្វើអន្តរាគមន៍ជួយបាញ់ទឹកពន្លត់អស់២គ្រឿង អគ្គិភ័យក៏រលត់ទៅវិញ ជាស្ថាពរ មិនរាលដាលដល់ផ្ទះប្រជាពលរដ្ឋ ឬបង្កគ្រោះថ្នាក់ដល់មនុស្សនោះទេ។
ក្នុងហេតុការណ៍នេះ ខូចខាតតែសម្ភារខ្លះមានគ្រែចំនួន១, សាឡូុងចំនួន១,ទូដាក់ខោអាវចំនួន១, អាសនៈចំនួន១ និងពុំបណ្តាលឱ្យមានអ្នករងរបួសនោះទេ ហើយក៏មិនឆាបឆេះរាលដាលដល់ផ្ទះអ្នកក្បែរខាងឡេីយ ដោយអគ្គិភ័យបានរលត់ទៅវិញនៅវេលាម៉ោង ៣ និង ២៤នាទីនាថ្ងៃខែឆ្នាំដដែល៕ ដោយ៖ រ៉ារ៉ា
