សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារព័ត៌មានជប៉ុន Kyodo នៅថ្ងៃទី១៧ ខែមីនា ឆ្នាំ២០២១ បានចុះផ្សាយថា ប្រធានក្រុមច្នៃប្រឌិតលើការរៀបចំពិធីបើក និងបិទព្រឹត្តិការណ៍អូឡាំពិក និងប៉ារ៉ាឡាំពិកក្រុងតូក្យូ លោក Hiroshi Sasaki បានលាឈប់ពីតំណែងនេះ បន្ទាប់ពីលោកបានអត្ថាធិប្បាយបែបប្រមាថលើតារាស្ត្រីជប៉ុនម្នាក់។
ភ្នាក់ងារព័ត៌មាន Kyodo បានចុះផ្សាយថាលោក Hiroshi Sasaki បានលើកឡើងពីតារាជប៉ុនម្នាក់ឈ្មោះ Naomi Watanabe ដោយបានប្រាប់ក្រុមផែនការក្នុងន័យលេងសើចថា ស្រ្តីវ័យ៣៣ឆ្នាំដែលមានរាងធាត់ផងនោះ អាចដើរតួជា «Olympig» នៅក្នុងពិធីបើកកីឡាអូឡាំពិក។ ហើយនេះជាករណីទី២ផងដែរ ជុំវិញការតិះទៀនស្រ្តី ពីសំណាក់មន្ត្រីសំខាន់ៗនៅក្នុងព្រឹត្តិការណ៍លំដាប់ពិភពលោកមួយនេះ។
ចំណែកលោក Yoshiro Mori ជាបុរសដំបូងដែលបានចុះចេញពីតំណែងប្រធានគណៈកម្មកាធិការរៀបចំកីឡាអូឡាំពិកក្រុងតូក្យូឆ្នាំ ២០២០ ក្រោយអត្ថាធិប្បាយថា «ស្ត្រីនិយាយច្រើនពេក»។ នេះបើតាមការចុះផ្សាយពីទស្សនាវដ្តីព័ត៌មានប្រចាំសប្តាហ៍របស់ជប៉ុន Shukan Bunshun។ ទោះជាយ៉ាងណាលោក Sasaki ក៏បានដឹងពីកំហុសពីការនិយាយររបេញរបុញរបស់ខ្លួន និងបានសុំទោសតារាជប៉ុននោះផងដែរ។ បន្ថែមពីនេះ លោកបញ្ជាក់ថា៖«ខ្ញុំសុំទោសដោយស្មោះចំពោះនាង និងមនុស្សដែលមានអារម្មណ៍មិនសប្បាយចិត្តនឹងការនិយាយបែបលេងសើចរបស់ខ្ញុំ»។
គួរបញ្ជាក់ថា លោក Hiroshi Sasaki មានវ័យ៦៦ឆ្នាំ ត្រូវបានតែងតាំងជាប្រធានក្រុមច្នៃលើការបើកបិទអូឡាំពិកកាលពីខែធ្នូ កន្លងទៅនេះ បានព្យាយាមកែលម្អផែនការសម្រាប់កម្មវិពិធីជាច្រើន បន្ទាប់ពីព្រឹត្តិការណ៍នេះត្រូវបានពន្យាររយៈពេលមួយឆ្នាំដោយសារតែជំងឺកូវីដ-១៩ រាតត្បាតជុំវិញពិភពលោក៕
ដោយ៖ស តារា
លោក Hiroshi Sasaki ប្រធានក្រុមច្នៃប្រឌិតលើការរៀបចំពិធីបើក និងបិទព្រឹត្តិការណ៍អូឡាំពិក និងប៉ារ៉ាឡាំពិកក្រុងតូក្យូ
រូបថត៖AP
