សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ រថយន្តធុនធ្ងន់ដឹកខ្សាច់បែកកង់ឈប់ចតលើផ្លូវគ្មានដាក់សញ្ញាសម្គាល់ខ្វះការប្រុងប្រយ័ត្នត្រូវម៉ូតូមួយគ្រឿងជិះគ្នាពីរនាក់បើកបុកពីក្រោយយ៉ាងពេញទំហឹងបង្កការភ្ញាក់ផ្អើលដល់អ្នកភូមិនិងសមត្ថកិច្ចទាំងយប់។
ហេតុការណ៍នេះបានកើតឡើងកាលពីវេលាម៉ោង៨និង២៥នាទីយប់នៅលេីផ្លូវជាតិលេខ៣១៤D ត្រង់ចន្លោះគីឡូម៉ែត្រលេខ៨-៩ ក្នុងភូមិព្រៃសាគុំ ឃុំ ព្រៃធំ ស្រុកកំពង់រោទ៍ ខេត្តស្វាយរៀង។
សមត្ថកិច្ចនគរបាលស្រុកបានឱ្យដឹងថាអ្នកជិះម៉ូតូដែលរងរបួសទី១ឈ្មោះ សោម រ៉ាល ភេទប្រុស អាយុ ៣៥ឆ្នាំ និងទី២ជាក្មួយប្រុសមានឈ្មោះឡា សាប៊ុង ភេទ ប្រុស អាយុ៥ឆ្នាំ រស់នៅភូមិព្រៃវល្លិ ឃុំថ្មី ស្រុកកំពង់រោទ៍ ខេត្ត ស្វាយរៀង។
បើតាមសាក្សីបានឱ្យដឹងថា មុនពេលកើតហេតុមានមនុស្សពីរនាក់បានជិះម៉ូតូមួយគ្រឿងម៉ាកហុងដាវ៉េវ ពណ៌ក្រហម អត់ស្លាកលេខក្នុងទិសដៅពីជើងទៅត្បូង ខណៈនោះស្រាប់តែទៅបុករថយន្តធុនធ្ងន់ម៉ាកដេវូ ពណ៌ក្រហម ពាក់ស្លាកលេខ ស្វាយរៀង ៣A-១៩៤៣ ដែលបែកកង់ ឈប់ចតលើផ្លូវដោយគ្មានភ្លើងសញ្ញា
សម្គាល់ពីក្រោយយ៉ាងពេញទំហឹងបង្កការភ្ញាក់ផ្អើលតែម្ដង។
ក្រោយកើតហេតុវត្ថុតាងមធ្យោបាយធ្វើដំណើរទាំងពីរគ្រឿងត្រូវបានសមត្ថកិច្ចធ្វើការវាស់វែងនិងអូសយកទៅរក្សាទុកនៅអធិការដ្ឋាននគរបាលស្រុកកំពង់រោទ៍ ដើម្បីដោះស្រាយពេលក្រោយតាមច្បាប់៕ យឹម សុថាន
