សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សាលាដំបូងរាជធានីភ្នំពេញ បន្ទាប់ពីធ្វើការសាកសួរប្រជាពលរដ្ឋចំនួន ៣នាក់ ដែលនាំគ្នាជួបជុំស៊ីផឹក និងច្រៀងខារ៉ាអូខេ ល្មើសនឹងវិធានការ របស់ក្រសួងសុខាភិបាល ហើយត្រូវកម្លាំងសមត្ថកិច្ចនគរបាលខណ្ឌសែនសុខ ចាប់ឃាត់ខ្លួនបញ្ជូនទៅតុលាការ ដេីម្បីបន្តនីតិវិធីច្បាប់កាលពីថ្ងៃទី៦ ខែមេសា ឆ្នាំ២០២១ថ្មីៗនេះ ត្រូវបានតុលាការអនុញ្ញាតឲ្យត្រឡប់ទៅផ្ទះវិញហើយ។ ប៉ុន្តែតម្រូវឲ្យមានការពិន័យអន្តរកាល។
គួររម្លឹកថា កាលពីថ្ងៃទី៤ ខែមេសា វេលាម៉ោងជាង ៥ល្ងាច កម្លាំងប៉ុស្តិ៍នគរបាលគោកឃ្លាង បានឃាត់ខ្លួនជនសង្ស័យ៣នាក់ ករណីល្មើសវិធានការសុខាភិបាលក្នុងការប្រយុទ្ធប្រឆាំងជំងឺកូវីដ-១៩ (ជួបជុំស៊ីផឹក និងច្រៀងខារ៉ាអូខេ) នៅចំណុចមុខបន្ទប់ជួលក្នុងផ្សារបឹងបៃតង ផ្លូវបេតុង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ។
ដោយជនសង្ស័យទី១-ឈ្មោះ អូន រតនា ភេទប្រុស អាយុ៣៧ឆ្នាំ មុខរបរជាងម៉ាស៊ីនរោងចក្រ វួយឈែង ស្នាក់នៅបន្ទប់ជួល ផ្លូវបេតុង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ (គ្មានសារធាតុញៀន), ទី២-ឈ្មោះ ហូ រុនមុនី ភេទប្រុស អាយុ៣០ឆ្នាំមុខរបរលក់ដូរ ស្នាក់នៅបន្ទប់ជួល ផ្លូវបេតុង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ (គ្មានសារធាតុញៀន), ទី៣-ឈ្មោះ ហេង សូវីត ភេទប្រុស អាយុ៧២ឆ្នាំ មុខរបរនៅផ្ទះ ស្នាក់នៅបន្ទប់ជួល ផ្លូវបេតុង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ (គ្មានសារធាតុញៀន)។ លុះនៅថ្ងៃទី៦ ខែមេសា កម្លាំងនគរបាលខណ្ឌសែនសុខ បានបញ្ជូនបុរស៣នាក់ ទៅតុលាការ ដេីម្បីបន្តនីតិវិធីច្បាប់។
បេីតាមអ្នកនាំពាក្យសាលាដំបូងរាជធានីភ្នំពេញលោកគុជ គឹមឡុងបានឲ្យដឹងនៅយប់ថ្ងៃទី០៧ ខែមេសា ឆ្នាំ២០២១ថា ប្រជាពលរដ្ឋទាំងបីនាក់ ដែលជួបជុំផឹកស៊ីច្រៀងខារ៉ាអូខេ ហើយត្រូវសមត្ថកិច្ចឃាត់ខ្លួនបញ្ជូនមកតុលាការ គឺល្មើសនិងមាត្រា៣ នៃច្បាប់ស្តីពីកូវីដ។ ហើយទណ្ឌកម្មរបស់ពួកគាត់យោងតាមមាត្រា៥ គឺពួកគាត់មិនមានទណ្ឌកម្មជាប់ពន្ធនាគារទេ គឺតម្រូវឲ្យមានពិន័យអន្តរកាល។
អ្នកនាំពាក្យរូបនេះ បន្តថា ក្រោយពីសាកសួរតាមនីតិវិធីរួចលោក មុត តារា ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចឲ្យខាងក្រសួងសុខាភិបាលជាសមត្ថកិច្ចនៅក្នុងការពិន័យអន្តរកាល។ ហើយបានឲ្យពួកគាត់ធ្វើកិច្ចសន្យានិងអប់រំឲ្យចូលរួមដើម្បីគោរពវិធានសុខាភិបាល និងបានអនុញ្ញាតឲ្យត្រឡប់ទៅផ្ទះវិញផងដែរ៕ ដោយ៖ស តារា
