សារព័ត៌មាន នគរវត្ត តែងតែនាំមុខគេជានិច្ច
ក្លិបនៅអង់គ្លេស Swansea City បានប្រកាសធ្វើពហិការតាមប្រព័ន្ធផ្សព្វផ្សាយសង្គមរយៈពេលមួយសប្តាហ៍នៅលើគ្រប់វេទិកាទាំងអស់ដើម្បីប្រយុទ្ធប្រឆាំងនឹងការរំលោភបំពាន និងការរើសអើងជាតិសាសន៍។
តាមការប្រកាសរបស់ BBC Sport និងតាមគេហទំព័ររបស់ក្លិបបានឲ្យដឹងថា អ្នកចូលរួមដែលរួមមានក្រុមទីមួយ ក្រុមសិក្សា និងក្រុមស្ត្រី បុគ្គលិក និងគណនីផ្លូវការរបស់ក្លិបនឹងឈប់ចុះផ្សាយចាប់ពីម៉ោង ៧យប់នៅថ្ងៃទី៩ ខែមេសានេះ។
កីឡាករ Jamal Lowe របស់ក្លិប Swansea, កីឡាករ Ben Cabango និង Yan Dhanda ត្រូវបានគេរំលោភបំពានជាតិសាសន៍នៅលើបណ្តាញសង្គមក្នុងរយៈពេលពីរខែកន្លងមកនេះ។
ប្រធានក្រុម Swansea City លោក Matt Grimes បាននិយាយថា “យើងសង្ឃឹមថាជំហរនេះនៅទូទាំងក្លិបនឹងត្រូវបានគាំទ្រដោយមនុស្សគ្រប់គ្នា ។ក្នុងនាមជាក្រុមកីឡាករជិតស្និទ្ធគឺជាអ្វីដែលយើងទាំងអស់គ្នាមានអារម្មណ៍ងប់ងល់យ៉ាងខ្លាំង”។
លោកបន្តថា “ខ្ញុំយល់ថាវាគួរឱ្យភ្ញាក់ផ្អើលណាស់ដែលយើងនៅតែនិយាយអំពីការរើសអើងជាតិសាសន៍ និងការរំលោភបំពានលើប្រភេទនេះ។ យើងដឹងច្បាស់ពីសម្ពាធនៅក្នុងបាល់ទាត់ក្នុងកម្រិតនេះ ប៉ុន្តែវាមិនគួរត្រូវបានប៉ាន់ស្មានថាតើកម្រិតនៃការរំលោភបំពានបែបនេះអាចជះឥទ្ធិពលដល់នរណាម្នាក់យ៉ាងដូចម្តេចទេ”។
ព័ត៌មានថ្មីៗពីការប្រកួតដែលនឹងមកដល់នាពេលខាងមុខរបស់ក្លិប Swansea City ទល់នឹងក្រុម Millwall និង Sheffield Wednesday ក៏ដូចជាព័ត៌មានថ្មីៗនឹងបន្តផ្សាយលើគេហទំព័រផ្លូវការរបស់ក្លិប។
នាយកប្រតិបត្តិក្លិបលោក Julian Winter បានផ្ញើលិខិតទៅនាយកប្រតិបត្តិ Twitter លោក Jack Dorsey និងស្ថាបនិក Facebook ប្រធាន និងនាយកប្រតិបត្តិលោក Mark Zuckerberg ដើម្បីស្នើសុំឱ្យមានប៉ូលីសតឹងរឹង និងដាក់ទណ្ឌកម្មបន្ថែមទៀតចំពោះអ្នកដែលមានកំហុសពីការរំលោភបំពានគួរឱ្យស្អប់ខ្ពើម។
កាលពីខែកុម្ភៈ ឆ្នាំ២០២០ ហ្វេសប៊ុកបាននិយាយថា វាគួរឱ្យរន្ធត់ណាស់ចំពោះការរំលោភបំពានតាមអុីនធើណេតនៅឯកីឡាបាល់ទាត់ ហើយបានប្រកាសផ្លាស់ប្តូរច្បាប់ដែលគ្រប់គ្រងការផ្ញើសារដោយផ្ទាល់នៅលើ Instagram ដែលជាវេទិកាមួយដែលខ្លួនមាន។
ក្នុងខែដដែលនោះរដ្ឋាភិបាលអង់គ្លេសបានគំរាមក្រុមហ៊ុនប្រព័ន្ធផ្សព្វផ្សាយសង្គមនូវការពិន័យដែលអាចមានចំនួនរាប់ពាន់លានផោនប្រសិនបើពួកគេមិនបានដោះស្រាយការរំលោភបំពានលើវេទិការបស់ពួកគេនោះទេ ៕ដោយ ៖ ភារៈ
