សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ លោក អ៊ុំ រាត្រី អភិបាលខេត្តបន្ទាយមានជ័យ បានលេីឡេីងនៅក្នុងកិច្ចប្រជុំគណៈបញ្ជាការឯកភាពរដ្ឋបាលខេត្ត នៅថ្ងៃពុធទី៥ ខែឧសភា ឆ្នាំ២០២១នេះថា ដើម្បីលុបបំបាត់ខ្សែឆ្លងជំងឺកូវីដ-១៩ នៅក្នុងសហគមន៍ បានណែនាំឲ្យអាជ្ញាធរក្រុងប៉ោយប៉ែត ដែលកំពុងប្រឈមការរាតត្បាតនៃជំងឺកូវីដ១៩ ត្រូវរឹតត្បិតការធ្វើដំណើរចេញចូល។
ជាក់ស្ដែងនៅក្នុងកិច្ចប្រជុំនេះ លោក អ៊ុំ រាត្រី លើរបៀបវារៈសំខាន់ៗរួមមាន៖ សេចក្ដីណែនាំ សេចក្ដីសម្រេច របស់រាជរដ្ឋាភិបាល និងសេចក្ដីជូនដំណឹងរបស់ក្រសួងសុខាភិបាល ដែលផ្ដោតសំខាន់លើការងារអនុវត្តទប់ស្កាត់ ការរីករាលដាលជំងឺកូវីដ១៩ សម្រាប់ប្រទេសកម្ពុជាបច្ចុប្បន្ននេះ កំពុងប្រឈមនូវការរីករាលដាលកូវីដ១៩ មិនទាន់ធូរស្បើយនៅឡើយ។
លោកអភិបាលរូបនេះ បន្តថា សម្រាប់នៅខេត្តបន្ទាយមានជ័យ ចាប់ពីថ្ងៃទី២២ ខែមេសា ឆ្នាំ២០២១ មានករណីផ្ទុះជំងឺកូវីដ១៩ ក្នុងសហគមន៍ ភាគច្រើននៅក្រុងប៉ោយប៉ែតជាង៦០០នាក់ គិតត្រឹមថ្ងៃទី៤ ខែឧសភា ឆ្នាំ២០២១។ លោក អ៊ុំ រាត្រី បន្តទៀតថា នៅពេលនេះគឺជាដំណាក់កាលត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ក្នុងអំឡុងពេល នៃការឆ្លងរីករាលដាលជំងឺកូវីដ១៩ក្នុងសហគមន៍។
បន្ថែមពីនេះ លោក អ៊ុំ រាត្រី ក៏បានក្រើនរំលឹកដល់កងកម្លាំងប្រដាប់អាវុធគ្រប់ប្រភេទ ដែលកំពុងឈរជើងការពារតាមខ្សែបន្ទាត់ព្រំដែន រឹតបន្តឹងដាក់វិធានក្ដៅចំពោះ ការនាំមនុស្សចេញចូលឆ្លងកាត់ដោយខុសច្បាប់ ដែលជាប្រភពនៃការចម្លងមេរោគកូវីដ១៩។ ជាមួយគ្នានេះ លោកក៏បានក្រើនរំលឹកដល់កងកម្លាំងប្រដាប់អាវុធគ្រប់ប្រភេទ ដែលកំពុងឈរជើងការពារតាមខ្សែបន្ទាត់ព្រំដែន ត្រូវធ្វើការរឹតបន្តឹង នូវវិធានការលុបបំបាត់ ការនាំមនុស្សចេញចូលឆ្លងកាត់ដោយខុសច្បាប់។
លេីសពីនេះទៅទៀត លោក អ៊ុំ រាត្រី បានសង្កត់ធ្ងន់ថា ដើម្បីធានារក្សាសន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គម ក្រសួងមហាផ្ទៃបានដាក់ចេញនូវគោលការណ៍ និងវិធានការជាបន្តបន្ទាប់ក្នុងការបង្ការទប់ស្កាត់ និងបង្រ្កាបសកម្មភាព នាំមនុស្សឆ្លងកាត់ព្រំដែន ដោយខុសច្បាប់ និងការគ្រប់គ្រងជនបរទេសស្របតាមច្បាប់។
ដោយឡែកជុំវិញបញ្ហានេះដែរ រដ្ឋបាលខេត្តបន្ទាយមានជ័យ បានកត់សម្គាល់ឃើញថា ករណីនៃការនាំពលរដ្ឋកម្ពុជា និងជនបរទេសឆ្លងកាត់ព្រំដែនដោយខុសច្បាប់ នៅតែកើតមានជាបន្តបន្ទាប់ក្នុងនោះក៏មានករណីមួយចំនួនមានក្រុមមេក្លោង និងមេខ្យល់ក្នុងស្រុក ឃុបឃិតជាមួយមេក្លោង មេខ្យល់ខាងក្រៅ ដើម្បីរត់ពន្ធមនុស្សឆ្លងកាត់ព្រំដែនដោយខុសច្បាប់ផងដែរ៕ដោយ៖សហការី
