សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុដោយសារតែករណីគ្រោះថ្នាក់ចរាចរណ៍ដ៏គួរឲ្យរន្ធត់រវាងម៉ូតូជិះបត់ឆ្វេងខ្វះការប្រុងប្រយ័ត្នត្រូវរថយន្តមកពីក្រោយស្របទិសគ្នាបុកយ៉ាងពេញទំហឹងបង្កការភ្ញាក់ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង៨និង៥នាទីយប់ថ្ងៃទី៧ខែឧសភាឆ្នាំ២០២១នៅលើផ្លូវជាតិលេខ១៣ក្រាលកៅស៊ូ ត្រង់ចន្លោះគីឡូម៉ែត្រលេខ៣៤និង៣៥ក្នុងភូមិចុងអូរ ឃុំកំពង់ត្រាច ស្រុករមាសហែក ខេត្តស្វាយរៀង។
យោងតាមសមត្ថកិច្ចនគរបាលស្រុករមាសហែកបានឱ្យដឹងថា បុរសដែលស្លាប់មានឈ្មោះចាប ស៉ីដេត អាយុ២៨ឆ្នាំ មុខរបរកសិករ រស់នៅភូមិចុងអូរ ឃុំកំពង់ត្រាច ស្រុករមាសហែក ខេត្តស្វាយរៀង ។
ចំណែកអ្នកបើករថយន្តត្រូវបានសមត្ថកិច្ចឃាត់ខ្លួនមានឈ្មោះទេព ប៊ុនធឿន អាយុ២៦ឆ្នាំ មុខរបរបើកបររថយន្ត រស់នៅភូមិទួលសុក្រំ ឃុំត្រពាំងស្តៅ ស្រុករមាសហែក ខេត្តស្វាយរៀង។
តាមសាក្សីបានឱ្យដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកហុងដាគុបC៥០ ស៊េរីចាស់ ពណ៌សំបកឪឡឹក ពាក់ស្លាកលេខ៤១៨១ក.ណ១ ធ្វើដំណើរលើផ្លូវជាតិលេខ១៣ ក្នុងទិសដៅពីត្បូងទៅជើង ហើយក៏បានបត់ឆ្វេងខ្វះប្រុងប្រយត្ន័ក៏ត្រូវរថយន្តម៉ាកសាំងយ៉ុង ពណ៌ខៀវ ពាក់ស្លាកលេខកោះកុង១A-០៧៦៦ដែលបើកក្នុងទិសដៅស្របគ្នាចាប់ហ្វ្រ័ងមិនទាន់ក៏បុកយ៉ាងពេញទំហឹងបង្កការភ្ញាក់ផ្អើលតែម្ដង។
ក្រោយកើតហេតុ អ្នកបើកបររថយន្តត្រូវបានសមត្ថកិច្ចឃាត់ខ្លួនយកទៅកាន់អធិការដ្ឋាននគរបាលស្រុករមាសហែកដើម្បីចាត់ការបន្តតាមច្បាប់។
សពត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត៕
ដោយ៖យឹម សុថាន
