សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រុមការងារថ្នាក់ជាតិប្រយុទ្ធប្រឆាំងនឹងជំងឺ COVID-19 របស់ប្រទេសបារ៉ែន នៅថ្ងៃសុក្រទី៧ ខែឧសភា ឆ្នាំ២០២១ បានប្រកាសពីការចាក់វ៉ាក់សាំងបង្ការជំងឺ COVID-19 ដូសទី៣ សម្រាប់អ្នកដែលបានចាក់វ៉ាក់សាំងគ្រប់ដូសរួចហើយ។
បើតាមសារព័ត៌មានចិនស៉ីនហួរ នៅព្រឹកថ្ងៃសៅរ៍ ទី០៨ ខែឧសភា ឆ្នាំ២០២១ បានដកស្រង់ប្រភពព័ត៍មានពីអាជ្ញាធរសុខាភិបាលបារ៉ែន បានគូសបញ្ជាក់ថា ជាផ្នែកមួយនៃដំណាក់កាលថ្មី នៃការចាក់វ៉ាក់សាំងបង្ការជំងឺ COVID-19 វ៉ាក់សាំងដូសទី ៣ នឹងត្រូវផ្តល់ការចាក់ជូនដល់ក្រុមមនុស្ស ដែលមានអាយុចាប់ពី ៦០ឆ្នាំឡើងទៅ, ក្រុមអ្នកដែលមានបញ្ហាសុខភាពរុំារ៉ៃ និងក្រុមបុគ្គលិកថែទាំសុខភាពផ្សេងទៀត នៅក្នុងរយៈពេល ០៦ខែ បន្ទាប់ពីពួកគេបានចាក់វ៉ាក់សាំងដូសទី ២។
បន្ថែមពីនេះ ក្រុមការងារថ្នាក់ជាតិប្រយុទ្ធប្រឆាំងនឹងជំងឺ COVID-19 បានគូសបញ្ជាក់បន្ថែមថា ព័ត៌មានលំអិតនៃការចុះឈ្មោះ ដើម្បីចាក់វ៉ាក់សាំងបង្ការជំងឺ COVID-19 ដូសទី ៣ នឹងត្រូវប្រកាសនៅប៉ុន្មានសប្តាហ៍ខាងមុខនេះ។ ខណៈបុគ្គលម្នាក់ៗមានជម្រើសក្នុងការជ្រើសរើស វ៉ាក់សាំងប្រភេទដូចគ្នា ឬខុសគ្នាសម្រាប់ការចាក់ដូសទី៣។
គួរជម្រាបថា ប្រជាជននៅទូលទាំងប្រទេសបារ៉ែន មានចំនួនសរុបជាង ១.៧លាននាក់ បានផ្ដល់ការចាក់វ៉ាក់សាំងបង្ការជំងឺ COVID-19 គ្រប់ដូសជូនដល់ប្រជាជនខ្លួនជាងកន្លះលាននាក់រួចមកហើយ គិតត្រឹមថ្ងៃសុក្រសប្តាហ៍នេះ ខណៈប្រជាជនសរុបជាង ៧៧០,០០០នាក់ទៀត បានទទួលការចាក់យ៉ាងហោចណាស់ ១ដូស។
ដោយឡែក បើគិតត្រឹមថ្ងៃដដែលនេះ ប្រទេសបារ៉ែន មានអ្នកឆ្លង COVID-19 សរុបជាង ១៨៦,០០០ករណី ក្នុងនោះមានអ្នកស្លាប់សរុប ៦៧៤នាក់ និងជាសះស្បើយវិញ ១៧៣,០០០នាក់៕
ដោយ៖ស តារា
រូបភាព៖ឯកសារ ប្រទេសបារ៉ែន
