សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បើតាមមន្ត្រីជាន់ខ្ពស់នគរបាលជាតិ ថ្លែងប្រាប់សារព័ត៌មានឲ្យដឹងថា, នៅព្រឹកថ្ងៃទី១៧ ខែឧសភា ឆ្នាំ២០២១នេះ សមត្ថកិច្ចបានបញ្ជូនខ្លួនកូនប្រសារឧកញ៉ា ហេង សៀ ទៅសាលាដំបូងរាជធានីភ្នំពេញ ដើម្បីបន្ដនីតិវិធី ក្រោយចាប់ឃាត់ខ្លួនពាក់ព័ន្ធការផ្ដើមគំនិតប្រឌិតរូបភាពអាសអាភាសបំផ្លាញកិត្តិយសកញ្ញា មាន ពេជ្ររីតា ពិធីការិនីទូរទស្សន៍ MYTV។
សូមជម្រាបថា កាលពីយប់ថ្ងៃទី១៥ ខែឧសភា ឆ្នាំ២០២១ សមត្ថកិច្ចបានចាប់ឃាត់ខ្លួនកូនប្រសារឧកញ៉ា ហេង សៀ ពាក់ព័ន្ធបង្កើតរូបភាពអាសអាភាសដើម្បីបំភាន់សាធារណជន និងបំផ្លាញកិត្តិយស យ៉ាងធ្ងន់ធ្ងរបំផុតលើកញ្ញា មាន ពេជ្ររីតា។ ក្រោយមកទៀតសមត្ថកិច្ចក៏ឈានដល់ការឃាត់ខ្លួនកូនស្រីបង្កើតរបស់ឧកញ្ញ៉ា ហេងសៀ ដែលត្រូវជាភរិយារបស់ជនសង្ស័យខាងលើនេះ។
សម្ដេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាដាច់ណាត់ ឲ្យក្រុមមេធាវីស្ម័គ្រចិត្តសម្ដេចតេជោ ហ៊ុនសែន ដឹកនាំដោយលោក គី តិច ត្រូវការពារក្តីឱ្យកញ្ញា មាន ពេជ្ររីតា ដល់ទីបញ្ចប់។ ពិសេសគឺស្រាវជ្រាវបន្តវែលរកឱ្យឃើញនូវក្រុមជនដែលពាក់ព័ន្ធក្នុងបទល្មើសនេះ៕
ដោយ៖ សុខ ខេមរា
