សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រុមការងារចាក់វ៉ាក់សាំងរបស់ក្រសួងការពារជាតិ រយៈពេល២០ថ្ងៃកន្លងមកនេះ បានចាក់ដូសទី១ ជូនប្រជាពលរដ្ឋបានជាង ៧៥ម៉ឺននាក់ ខណៈការចាក់ដូសទី២ ដែលចាប់ផ្តើមកាលពីថ្ងៃទី១៦ ខែឧសភា ចាក់បានជាង ១៩ម៉ឺននាក់។ ក្នុងប្រតិបត្តិការចាក់វ៉ាក់សាំងប្រឆាំងជំងឺកូវីដ-១៩ ជូនប្រជាពលរដ្ឋនៅតំបន់ក្រហមក្នុងរាជធានីភ្នំពេញ ក្រោមបទបញ្ជាផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅតែបន្តទាំងដូសទី១ និងដូសទី២ ក្រោមការយកចិត្តទុកដាក់ខ្ពស់ពីក្រុមការងារចាក់វ៉ាក់សាំងរបស់ក្រសួងការពារជាតិ។
ជាក់ស្ដែងនៅព្រឹកថ្ងៃសុក្រ ទី២១ ខែឧសភា ឆ្នាំ២០២១ យោងតាមរបាយការណ៍របស់ក្រុមការងារចាក់វ៉ាក់សាំងក្រសួងការពារជាតិ បានបង្ហាញថា ការចាក់វ៉ាក់សាំងនៅតំបន់ក្រហម រយៈពេល ២០ថ្ងៃកន្លងទៅនេះ ការចាក់ដូសទី១ ចាក់បានសរុបចំនួន ៧៥៣,៤០៩នាក់ ស្រី ៤០៦,១៧១នាក់។ ដោយឡែកអ្នកចាក់ដូសទី២ ចាក់បាន ១៩១,៣០១នាក់ ស្រី ៩១,៨៦៥នាក់។
តំបន់ក្រហមដែលកងទ័ពកំពុងប្រតិបត្តិការចាក់វ៉ាក់សាំងនេះ រួមមាន៖ ខណ្ឌមានជ័យ, ខណ្ឌដង្កោ, ខណ្ឌកំបូល, ខណ្ឌពោធិ៍សែនជ័យ, ខណ្ឌឫស្សីកែវ និងខណ្ឌទួលគោក។
បេីតាមនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានក្រុមការងារចាក់វ៉ាក់សាំងនៅតំបន់ក្រហម បានកត់សម្គាល់ថា ដំណើរការចាក់វ៉ាក់សាំងទាំងដូសទី១ និងដូសទី២ កំពុងបន្តដំណើរការល្អប្រសើរ ក្រោមការយកចិត្តទុកដាក់ខ្ពស់ពីក្រុមការងារ។
បើទោះបីក្រុមការងារកំពុងដំណើរការចាក់ដូសទី២ តែដូសទី១ នៅតែបន្តជាធម្មតាផងដែរ។ របាយការណ៍បានបង្ហាញថា នៅថ្ងៃទី២០ ខែឧសភា ការចាក់ដូសទី១ គឺចាក់បាន ១១,៦១១នាក់។ ជាការកត់សម្គាល់ការចាក់ដូសទី១ នៅតំបន់ក្រហមនៅតែមានចំនួនច្រើន។
នាយឧត្តមសេនីយ៍ ឥត សារ៉ាត់ បានបញ្ជាក់ថា ទិន្នន័យអ្នកចាក់វ៉ាក់សាំងក្នុងតំបន់ក្រហមនៅខណ្ឌពោធិ៍សែនជ័យ ដង្កោ កំបូល និងមានជ័យ ពីដំបូងមានត្រឹមជាង ៥០ម៉ឺននាក់នោះ មកដល់ពេលនេះ ការចាក់កើនឡើងរហូតដល់ជាង ៧០ម៉ឺននាក់។ ទិន្នន័យនេះ គឺកើនជាង ២០ម៉ឺននាក់ បើធៀបនឹងទិន្នន័យផ្តល់ដោយអាជ្ញាធររាជធានីភ្នំពេញពីដំបូងនោះ។
ជាមួយដំណើរការចាក់វ៉ាក់សាំងនេះដែរ នាយឧត្តមសេនីយ៍ បន្តក្រើនរំលឹកដល់ក្រុមការងារចាក់វ៉ាក់សាំងទាំងអស់ ពិនិត្យពិច័យឱ្យបានល្អិតល្អន់បំផុតក្នុងការចាក់វ៉ាក់សាំងជូនប្រជាពលរដ្ឋ ធ្វើយ៉ាងត្រូវប្រាកដគម្លាតការចាក់រវាងដូសទី១ មកដូសទី២ មានរយៈពេល ១៤ថ្ងៃ និងចាក់ឱ្យត្រឹមត្រូវតាមបច្ចេកទេស ដើម្បីធានាថា ពលរដ្ឋមានវ៉ាក់សាំងក្នុងខ្លួនការពារជំងឺកូវីដ-១៩។
នាយឧត្តមសេនីយ៍ ឥត សារ៉ាត់ ក៏បានបញ្ជាក់ និងអំពាវនាវដល់ប្រជាពលរដ្ឋដែលទៅចាក់វ៉ាក់សាំងដូសទី២ ត្រូវយកឯកសារ និងបំពេញលក្ខខណ្ឌសំខាន់ៗមួយចំនួន។
ឯកសារ និងលក្ខខណ្ឌដែលត្រូវអនុវត្តន៍ឱ្យបានសម្រាប់ការចាក់វ៉ាក់សាំងដូសទី២នេះ រួមមាន៖ យកឯកសារជាទម្រង់ចាក់វ៉ាក់សាំងដូសទី១មកជាមួយ, ចាក់ដូសទី១ នៅកន្លែងណា ត្រូវចាក់ដូសទី២ នៅកន្លែងដដែលនោះ, ត្រូវដឹងពេលវេលាដែលកំណត់ចាក់ដូសទី២ (គ្រប់១៤ថ្ងៃ) ចៀសវាងការមកកកកុញ និងប៉ះពាល់ដល់ប្រសិទ្ធភាពរបស់ថ្នាំ។ ជាពិសេសនោះ អ្នកដែលមានជំងឺកូវីដ-១៩ មិនអនុញ្ញាតឱ្យទៅចាក់ដូសទី២នោះឡើយ។
លោក ឥត សារ៉ាត់ ក៏បានអំពាវនាវដល់ប្រជាពលរដ្ឋដែលបានចាក់វ៉ាក់សាំងដូសទី២រួចរាល់ ត្រូវរក្សាទម្រង់បណ្ណចាក់វ៉ាក់សាំងបណ្តោះអាសន្នឱ្យបានត្រឹមត្រូវ កុំឱ្យបាត់បង់ ឬរហែក ដើម្បីទុកប្តូរយកបណ្ណចាក់វ៉ាក់សាំង ដែលក្រុមការងារកំពុងផលិត។ ដោយឡែកអ្នកដែលទទួលបានបណ្ណចាក់វ៉ាក់សាំងហើយ ក៏ត្រូវចេះថែរក្សាកុំឱ្យបាត់បង់ ព្រោះអាចមានភាពចាំបាច់ប្រើប្រាស់ទៅថ្ងៃខាងមុខ។
ជាមួយគ្នានេះ នាយឧត្តមសេនីយ៍ ឥត សារ៉ាត់ ក៏បានអំពាវនាវដល់ប្រជាពលរដ្ឋនៅតំបន់ក្រហម ដែលមិនទាន់បានចាក់វ៉ាក់សាំងដូសទី១ នៅឡើយនោះទៅចូលរួមចាក់វ៉ាក់សាំង ព្រោះក្រុមការងារនៅតែបន្តចាក់ដូសទី១ជូន ហើយសូមចូលរួមអនុវត្តន៍ឱ្យបានល្អប្រសើរតាមវិធានសុខាភិបាលនៅពេលទៅចាក់វ៉ាក់សាំង។
ប្រជាពលរដ្ឋដែលទទួលបានការចាក់វ៉ាក់សាំងទាំងដូសទី១ និងទី២ សុទ្ធតែបានបង្ហាញការរីករាយ និងបានអរគុណសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានស្វះស្វែងរកវ៉ាក់សាំង ហើយផ្តល់អាទិភាពចាក់សម្រាប់អ្នកតំបន់ក្រហម។ ជាមួយគ្នានេះប្រជាពលរដ្ឋ ក៏បានថ្លែងអំណរគុណដល់ក្រុមការងារចាក់វ៉ាក់សាំង ដែលបានយកចិត្តទុកដាក់ខ្ពស់លើការងារចាក់វ៉ាក់សាំងជូនពួកគេ។
បើទោះបីបានចាក់វ៉ាក់សាំងរួចរាល់ទាំងពីរដូសយ៉ាងណាក្តី នាយឧត្តមសេនីយ៍ ឥត សារ៉ាត់ បានក្រើនរំលឹកដល់ប្រជាពលរដ្ឋឱ្យបន្តស្មារតីអនុវត្តវិធានទាំងឡាយរបស់ក្រសួងសុខាភិបាល ជាពិសេសអនុសាសន៍សម្តេចតេជោ «៣កុំ ៣ការពារ» ដើម្បីធានាថាមិនឆ្លងជំងឺកូវីដ-១៩៕ ដោយ ៖ សហការី
