សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ ស្ត្រីខ្មែរចំនួន២នាក់និងបុរសជនជាតិប៉ាគីស្ថានម្នាក់ នៅវេលាម៉ោង៩និង២៤នាទីយប់ថ្ងៃទី២២ខែឧសភា ឆ្នាំ២០២១ ប្រជាពលរដ្ឋនៅភូមិតេជោភ្នំឆ័ត្រ ឃុំស្វាយចេក ស្រុកស្វាយចេកក្បែរជាយដែនថៃ រាយការណ៍ទៅកម្លាំងនគរបាលសហការជាមួយកម្លាំងប្រជាការពារ ប្រចាំការទប់ស្កាត់ពលករលួចឆ្លងដែននៅ គោលដៅតេជោភ្នំឆ័ត្រថាប្រទះឃើញមនុស្សប្រុសស្រី ចំនួន៣នាក់ ត្រូវរថយន្តមិនស្គាល់ម៉ាកបានដឹកមកទម្លាក់ចោលនៅមុខផ្ទះគ្មានម្ចាស់ចំណុចភូមិតេជោភ្នំឆ័ត្រ ឃុំស្វាយចេក។
លោក ដោក ខាំ នាយប៉ុស្តិ៍ឃុំផ្គាំ ឈរជើងនៅគោលដៅតេជោភ្នំឆ័ត្រ បានឲ្យដឹងថា៖
ស្ត្រីជនជាតិខ្មែរ២នាក់ទី១ឈ្មោះ ប៊ុន ហ្កិច អាយុ២០ឆ្នាំទី២-ឈ្មោះ ប៊ុន សៀកទៀង អាយុ១៨ឆ្នាំ អ្នកទាំងពីរត្រូវជាបងប្អូននឹងគ្នារស់នៅភូមិព្រែកគយ ឃុំព្រែកគយ ស្រុកស្អាង ខេត្តកណ្តាល ។ចំណែកបុរសជនជាតិប៉ាគីស្ថាន ឈ្មោះ មហាម៉ាត់អៃយ៉ាស់ អាយុ ៤៥ឆ្នាំ ស្នាក់នៅផ្ទះជិតស្ត្រីខ្មែរទាំង២នាក់នោះ ។
លោក ដោក ខាំ បានបញ្ជាក់ថា ៖ តាមការសាកសួរ ពួកគេធ្វើដំណើរពីភ្នំពេញមកដេកនៅខេត្តសៀមរាបមួយយប់ និងដេកនៅខេត្តបន្ទាយមានជ័យមួយយប់ លុះល្ងាចថ្ងៃទី២២ ខែឧសភា រកឡានឈ្នួលជិះត្រឡប់ទៅភ្នំពេញវិញ តែមានរថយន្តម៉ាកកាម៉ារី១គ្រឿងដោយម្ចាស់រថយន្តបានដឹកពួកគេទៅទម្លាក់ចោលនៅទីតាំងខាងលើនោះទៅវិញធ្វើឲ្យពួកគេដាច់បាយដាច់ទឹកនិងថែមទាំងយកថ្លៃរថយន្តពីបន្ទាយមានជ័យទៅកន្លែងកើតហេតុចំនួន៥០ដុល្លារ ហើយបើកឡានគេចខ្លួនបាត់តែម្ដង។
លោកប្រាប់ថា៖អ្នកទាំង៣នាក់ បានបញ្ជូទៅមណ្ឌលសុំចតច្រកអូរបីជាន់ដើម្បីត្រួតពិនិត្យនិងធ្វើចត្តាឡីស័ក រកមេរោគកូវីដ-១៩៕
ដោយ ៖ វណ្ណា
