សារព័ត៌មាន នគរវត្ត តែងតែនាំមុខគេជានិច្ច
ក្លិប Real Madrid នឹងអាចរៀបចំការផ្តល់ជូនសម្រាប់កីឡាករ Eden Hazard និង Gareth Bale នៅរដូវក្តៅនេះចំពេលដែលពួកគេនៅតែចាប់អារម្មណ៍លើកីឡាករឆ្នើម២រូបគឺ Kylian Mbappe និង ErlingHaaland ។
យោងតាមការចេញផ្សាយរបស់ Sky Sport បានឲ្យដឹងថា Hazard រកគ្រាប់បាល់បានតែ៥គ្រាប់ប៉ុណ្ណោះចាប់តាំងពីគាត់ផ្លាស់ពីក្រុមតោខៀវកាលពី២ឆ្នាំមុនក្នុងកិច្ចព្រមព្រៀងដែលមានតម្លៃរហូតដល់១៣០លានផោន។
បញ្ហារបួសមានន័យថា កីឡាករសញ្ជាតិបែលហ្ស៊ិករូបនេះបានបង្ហាញវត្តមានត្រឹមតែ៤៣ប្រកួតប៉ុណ្ណោះក្នុងរាល់ការប្រកួតទាំងអស់ក្នុងរយៈពេល២រដូវនៅប្រទេសអេស្ប៉ាញ។ កីឡាករវ័យ៣០ឆ្នាំរូបនេះមិនបានស្ថិតក្នុងក្រុមសម្រាប់ការប្រកួតកាលពីថ្ងៃសៅរ៍ជាមួយក្រុម Villarreal នោះទេ ខណៈដែល Real Madrid បានបញ្ចប់រដូវកាលនេះនៅចំណាត់ថ្នាក់លេខ២ នៅLa Liga ដោយដេញតាមពីក្រោយក្រុមម្ចាស់ជើងឯក Atletico Madrid ចំនួន២ពិន្ទុ។
ក្រុមអធិរាជស Real Madrid ដែលចាញ់ក្រុមតោខៀវ Chelsea ក្នុងការប្រកួតវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League បានបញ្ចប់រដូវកាលនេះដោយមិនមានពានរង្វាន់ធំណាមួយឡើយចាប់តាំងពីឆ្នាំ២០០៩-២០១០ ។
ការមិនបានឡើងដល់វគ្គផ្តាច់ព្រ័ត្រនៃក្របខ័ណ្ឌកំពូលអឺរ៉ុប Champions League ធ្វើឲ្យក្លិបនេះចាប់អារម្មណ៍ Mbappe និង Haaland មានន័យថា Real Madrid ត្រូវការការរៃអង្គាសប្រាក់ពីការលក់កីឡាករនៅរដូវក្តៅនេះ។ ក៏ដូចជា Hazard និង Bale ដែរក្លិបនឹងស្តាប់ការផ្តល់ជូនសម្រាប់កីឡាករផ្សេងទៀតដូចជា Luka Jovic ។
Hazard បានឈ្នះពានរង្វាន់ធំៗ ចំនួន៦ក្នុងនោះរាប់បញ្ចូលទាំងពាន Premier League ២ដងក្នុងរយៈពេល៧រដូវកាលនៅ Chelsea ។ ទន្ទឹមនឹងនេះដែរ Bale បានចំណាយរដូវកាល ២០២០-២០២១ ក្នុងការខ្ចីជើងនៅក្លិប Tottenham ដោយរកបាន១៦គ្រាប់ និងបញ្ចប់យុទ្ធនាការនេះជាមួយការស៊ុតបញ្ចូលទីពីរដងនៅ Leicester កាលពីថ្ងៃអាទិត្យ។
បន្ទាប់ពីការប្រកួតនោះ Bale បាននិយាយថា គាត់បានធ្វើការសម្រេចចិត្តលើអនាគតរបស់គាត់ប៉ុន្តែនឹងរង់ចាំរហូតដល់យូរ៉ូនៅរដូវក្តៅនេះមុនពេលគាត់ប្រកាសជាសាធារណៈ។ កិច្ចសន្យារបស់ប្រធានក្រុមជម្រើសជាតិវែលរូបនេះជាមួយ Real Madrid នឹងផុតកំណត់នៅរដូវក្តៅឆ្នាំ២០២២ ៕ដោយ ៖ ភារៈ
