សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ ក្រុមអភិរក្សការពារធម្មជាតិនៅចំណុចមុខវត្តកំពង់ព្រះ ភូមិកំពង់ព្រះស្ថិត ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង បានលែងសត្វពស់ថ្លាន់ចូលក្នុងព្រៃធម្មជាតិចំនួន៣៨ក្បាលដើម្បីឲ្យសត្វនេះមានឱកាសបន្តពូជ។
ការលែងសត្វពស់ថ្លាន់៣៨ក្បាលនេះធ្វើឡើងកាលពីព្រឹកថ្ងៃទី២៥ ខែឧសភា ឆ្នាំ២០២១ ធ្វើឡើងដោយមន្ត្រីឧទ្យាននុរក្សសហការជាមួយក្រុមអន្តរាគមន៍បង្ក្រាបសត្វព្រៃចល័ត។
មន្ត្រីឧទ្យានអនុរក្សខេត្តកំពង់ឆ្នាំង បានឲ្យដឹងថា សត្វពស់ថ្លាន់ទាំងនេះត្រូវបានក្រុមឧទ្យាននុរក្ស និងក្រុមអន្តរាគមន៍បង្ក្រាបសត្វព្រៃចល័តប្រមូលពីភ្នំតាម៉ៅ និងតាមបណ្តាកន្លែងចិញ្ចឹមតាមផ្ទះផ្សេងៗ នៅក្នុងក្រុងភ្នំពេញ និងស្ទាក់ចាប់ពីក្រុមឈ្មួញដឹកជញ្ជូនសត្វព្រៃលក់ផងដែរ។
ជាមួយនេះលោកប្រធានក្រុមឧទ្យានុរក្ស ក៏បានធ្វើការអំពាវនាវដល់បងប្អូនប្រជាពលរដ្ឋនៅក្នុងតំបន់ក្ដី នៅក្រៅតំបន់ក្ដីមេត្តាជួយថែរក្សាការពារ និងអភិរក្សសត្វព្រៃគ្រប់ប្រភេទ កុំចាប់ឬសម្លាប់សត្វ និងកុំកាប់ដុតរុករានទន្ទ្រានដីព្រៃដែលជាជម្រកជីវចម្រុះគ្រប់ប្រភេទ។ សូមចូលរួមថែរក្សាធនធានធម្មជាតិរបស់ជាតិ យើងទាំងអស់គ្នាហើយត្រូវដឹងថាចាប់សត្វជួញដូរសត្វព្រៃជាអំពើផ្ទុយនិងច្បាប់ទាំងស្រុង៕
ដោយ ៖ ប្រាថ្នា
