សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ នៅព្រឹកថ្ងៃទី២៦ ខែឧសភា ឆ្នាំ២០២១ page ផ្លូវការរបស់ក្រសួងទេសចរណ៍ បានលើកឡើងពី កោះព្រហ្មចារី ជាផ្នែកដ៏សំខាន់មួយនៅក្នុង «សហគមន៍អេកូទេសចរណ៍កោះព្រហ្មចារីជ្រោយបន្ទាយ» ដែលមានទីតាំងស្ថិតនៅឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ពោលគឺមានចម្ងាយប្រមាណជិត ២០ គីឡូម៉ែត្រពីទីរួមខេត្តក្រចេះ។ ធម្មជាតិដ៏ស្រស់ត្រកាលនៅតាមទីប្រជុំកោះនេះ គឺផ្សាភ្ជាប់ទៅនឹងសក្តានុពលដ៏សម្បូរបែបនៃដងទន្លេមេគង្គ។ការធ្វើដំណើរទៅកាន់សហគមន៍នេះ គឺខុសពីការទៅទស្សនានៅទីទេសចរណ៍ផ្សេងទៀត ដោយភ្ញៀវទេសចរត្រូវធ្វើដំណើរតាមទូកកាណូតកាត់ដងទន្លេមេគង្គ នៅកំពង់ចម្លងឫស្សីចារ-ជ្រោយបន្ទាយ ដើម្បីបានឆ្លងទៅដល់សហគមន៍អេកូទេសចរណ៍មួយនេះ។ ទៅដល់សហគមន៍ ភ្ញៀវទេសចរអាចសម្រាក និងទទួលទានអាហារនៅផ្ទះស្នាក់ (Home Stay) របស់ប្រជាសហគមន៍មួយពេលសិន មុនបន្តដំណើរតាមកាណូតឆ្ពោះទៅប្រជុំកោះនៅក្នុងក្ដីសុបិន្ត។
រំលេចឆោមឆើតកណ្ដាលជលសារ កោះព្រហ្មចារីប្រៀបដូចវិមានទេសចរណ៍អណ្ដែតលើផ្ទៃគង្គាយ៉ាងស្រស់ត្រកាល។ ឆ្នេរខ្សាច់សម្បុសប៉ប្រះមាត់ទឹក ជាទីស័ក្តិសមបំផុតសម្រាប់ការបោះតង់សម្រាកនៅពេលរាត្រី។ ម្យ៉ាងវិញទៀត ភ្ញៀវទេសចរអាចគយគន់សម្រស់ជលធារានាពេលព្រះសូរិយារៀបអស្តង្គត និងទទួលទានអាហារពេលល្ងាចដែលប្រជាសហគមន៍រៀបចំជូន៕
ដោយ ៖ សិលា
