សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់បានរងរបួសជេីងឆ្វេងយ៉ាងធ្ងន់ធ្ងរព្រោះតែត្រូវរថយន្តក្រឡុកស៊ីម៉ងត៍មួយគ្រឿងបានបើកបុកម៉ូតូជនរងគ្រោះពីក្រោយរួចហើយកិនអូសជិត២០ម៉ែត្រ បង្កការភ្ញាក់ផ្អេីលដល់អ្នកដំណេីរនិងសមត្ថកិច្ចកាលពីវេលាម៉ោង១២ និង៣០នាទីរសៀលថ្ងៃទី១១ ខែមិថុនា ឆ្នាំ២០២១ ស្ថិតនៅចំណុចច្រមុះជ្រូកក្បាលថ្នល់ តាមបណ្ដោយផ្លូវព្រះមុនីវង្ស កែងនឹងផ្លូវលេខ២៧១ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីមន្ត្រីនគរបាលចរាចរណ៍ដែលឈរជើងនៅគោលដៅកន្លែងកេីតហេតុបានឱ្យដឹងថា មុនពេលកើតហេតុគេឃេីញស្ត្រីម្នាក់មានវ័យប្រហែល៤០ឆ្នាំ ជិះម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ1CB-5862តាមបណ្តោយផ្លូវព្រះមុនីវង្សក្នុងទិសដៅពីលិចទៅកើត ខណៈមកដល់ចំណុចកើតហេតុក៏បានឈប់ចាំភ្លើងស្តុប ពេលនោះក៏មានរថយន្តក្រឡុកស៊ីម៉ងត៍មួយគ្រឿង ពណ៌ស លាយឈាមជ្រូក ពាក់ស្លាកលេខ ភ្នំពេញ 5A-3181 បេីកបរដោយបុរសម្នាក់ធ្វេីដំណេីរមកពីក្រោយ ហេីយក៏បុកពីក្រោយម៉ូតូជនរងគ្រោះបត់មកឆ្វេងដៃកិនម៉ូតូអូសជិត២០ម៉ែត្រ ព្រមទាំងកិនជើងម្ខាងរបស់ស្ត្រីខាងលេីរងរបួសយ៉ាងធ្ងន់ធ្ងរ ។ ភ្លាមៗនោះសមត្ថកិច្ចដែលឈរជេីងនៅគោលដៅកន្លែងកេីតហេតុក៏បានឃាត់ខ្លួនតៃកុងរថយន្តបង្កបញ្ចូនទៅកាន់អធិការដ្ឋាននគរបាលខណ្ឌចំការមន ព្រមទាំងទាក់ទងទៅខាងរថយន្តសាមុយឲ្យមកដឹកស្ត្រីរងគ្រោះបញ្ចូនទៅសង្គ្រោះបន្ទាន់ផងដែរ ។
ក្រោយមកសមត្ថកិច្ចមូលដ្ឋានបានទាក់ទងទៅខាងសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះមកធ្វេីការវាស់វែងយករថយន្តបង្កហេតុនិងម៉ូតូរងគ្រោះទៅរក្សាទុកដេីម្បីរង់ចាំដោះស្រាយនៅពេលក្រោយ ៕
ដោយ ៖ ភារ៉ា ដង្កោ
