សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់នៅនឹងកន្លែងដោយសារគ្រោះថ្នាក់ចរាចរណ៍គួរឱ្យរន្ធត់ ចំណែកម៉ូតូត្រូវភ្លើងឆាបឆេះសល់តែគ្រោងឆ្អឹង បន្ទាប់ពីបុរសរងគ្រោះជិះម៉ូតូតែម្នាក់ឯងហើយត្រូវរថយន្តដែលប្រើប្រាស់ល្បឿនលឿនបើកស្របទិសគ្នាមកបុកពីក្រោយយ៉ាងពេញទំហឹងបង្កការភ្ញាក់ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី ២០ខែមិថុនាឆ្នាំ២០២១ស្ថិតនៅចន្លោះគីឡូម៉ែត្រលេខ១៤៣និង១៤៤ ក្នុងភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង។
នគរបាលជំនាញស្រុកស្វាយទាបបានឱ្យដឹងថា បុរសដែលស្លាប់មានឈ្មោះ អែម វ៉ា អាយុ៣៤ឆ្នាំ ជនជាតិខ្មែរ មុខរបរកម្មករសំណង់ រស់នៅភូមិព្រៃទប់ សង្កាត់ច្រកម្ទេស ក្រុងបាវិត ខេត្តស្វាយរៀង ខណ:ដែលម៉ូតូម៉ាក NOVO គ្មានស្លាកលេខត្រូវភ្លើងឆេះសល់តែគ្រោងឆ្អឹងប៉ុណ្ណោះ។
ចំណែកអ្នកបើករថយន្តបង្កហេតុត្រូវបានស្គាល់ឈ្មោះ នន់ ឡា ភេទប្រុស អាយុ៣៥ឆ្នាំ រស់នៅភូមិពោធិ៍ថ្មី ឃុំស្វាយតាយាន ស្រុកកំពង់រោទ៍ ខេត្តស្វាយរៀង បន្ទាប់ពីឃើញសភាពការណ៍មិនស្រួលបានរត់គេចខ្លួនបាត់ភ្លាមៗផងដែរ។
តាមសាក្សីបានឱ្យដឹងថា មុនកើតហេតុគេឃើញបុរសរងគ្រោះជិះម៉ូតូមួយគ្រឿងម៉ាក NOVO គ្មានស្លាកលេខក្នុងទិសដៅពីកើតទៅលិចតែម្នាក់ឯង ខណ:នោះស្រាប់តែមានរថយន្តមួយគ្រឿងម៉ាកCRV ពាក់ស្លាកលេខ ភ្នំពេញ ១AP-២០២៨បើកទិសដៅស្របគ្នាដោយប្រើប្រាស់ល្បឿនលឿនខ្វះការប្រុងប្រយ័ត្នបានបើកមកបុកពីក្រោយម៉ូតូយ៉ាងពេញទំហឹងបង្កការភ្ញាក់ផ្អើលដល់អ្នកភូមិទាំងយប់។ក្រោយកើតហេតុសមត្ថកិច្ចបានមកដល់ធ្វើការវាស់វែងនិងប្រគល់សពទៅឱ្យក្រុមគ្រួសារយកទៅធ្វើបុណ្យតាមប្រពៃណី រីឯមធ្យោបាយធ្វើដំណើរទាំងពីរគ្រឿងសមត្ថកិច្ចជំនាញបានយកមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយនៅពេលក្រោយតាមច្បាប់៕
ដោយ៖ យឹម សុថាន
