សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យមួយក្រុមមានគ្នា៤នាក់ជិះម៉ូតូ២គ្រឿងបានធ្វេីសកម្មភាពឆក់យកកាបូបលុយពីស្ត្រីម្នាក់បានសម្រេចកាលពីវេលាម៉ោង២០យប់ ថ្ងៃទី២០ ខែមិថុនា ឆ្នាំ២០២១ នៅចំណុចមុខផែស្ងួតតេងឡាយ តាមបណ្តោយមហាវិថីឈ្នះ=ឈ្នះ ក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ហេីយព្យាយាមគេចខ្លួនបាត់។ លុះមកដល់វេលាម៉ោង១៧ និង៣០នាទីល្ងាចថ្ងៃទី២១ ខែមិថុនា ឆ្នាំ២០២១ ជនសង្ស័យបានជិះម៉ូតូបម្រុងធ្វេីសកម្មភាពទៀតក៏ជួបកម្លាំងល្បាតធ្វើឱ្យមានការភិតភ័យ ហើយព្យាយាមជិះម៉ូតូគេចខ្លួនតែត្រូវសមត្ថកិច្ចដេញប៉ផាប់ចាប់ពភីងរហូតឃាត់បានជនសង្ស័យ២នាក់។
ជនសង្ស័យទី១-ឈ្មោះអេង វ៉ាន់ជា ភេទប្រុស អាយុ២៨ឆ្នាំ មុខរបរកម្មករសំណង់ ស្នាក់នៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។
ទី២-ឈ្មោះរ៉េត ចាន់ណា ភេទប្រុសអាយុ២៦ឆ្នាំ មុខរបរកម្មករលេីកបេតុង ស្នាក់នៅភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ។
ចំណែកជនរងគ្រោះឈ្មោះហាន់ សូដានី ភេទស្រី អាយុ៥១ឆ្នាំ មុខរបរលក់ដូរ ស្នាក់នៅភូមិសាមគ្គី សង្កាត់ត្រពាំងក្រសាំង ខណ្ឌពោធិ៍សែនជ័យ។
សម្ភារដែលបាត់បង់មានទូរស័ព្ទម៉ាកសាំសុង១គ្រឿង លុយចំនួន៤៨០.០០០រៀល ។
តាមប្រភពព័ត៌មានបានឱ្យដឹងថា មុនពេលកេីតហេតុជនរងគ្រោះបានជិះម៉ូតូតាមដងមហាវិថីឈ្នះ=ឈ្នះ ភ្លាមនោះស្រាប់តែលេចមុខជនសង្ស័យចំនួន៤នាក់ជិះម៉ូតូ២គ្រឿង ដោយមួយគ្រឿងម៉ាកនិច និងមួយគ្រឿងទៀតម៉ាកហុងដាសង់ប៊ិកមកធ្វេីសកម្មភាពឆក់យកកាបូបស្ពាយពីស្ត្រីរងគ្រោះបានសម្រេចហេីយគេចខ្លួនបាត់អស់ទៅ ។
ក្រោយកេីតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលត្រពាំងក្រសាំងដេីម្បីសុំកិច្ចអន្តរាគមន៍។
លុះមកដល់ថ្ងៃទី២១ ខែមិថុនា ឆ្នាំ២០២១ កម្លាំងនគរបាលប៉ុស្តិ៍ត្រពាំងក្រសាំង បានល្បាតនៅកន្លែងងាយរងគ្រោះ ខណៈមកដល់មុខផ្សារបឹងបៃតង ស្រាប់តែប្រទះឃេីញជនសង្ស័យ២នាក់ជិះម៉ូតូម៉ាកនិច ពណ៌ស ពាក់ស្លាកលេខភ្នំពេញ1IA 2793។ ដោយមានការសង្ស័យកម្លាំងសមត្ថកិច្ចក៏ហៅឱ្យឈប់ដេីម្បីត្រួតពិនិត្យ ភ្លាមនោះជនសង្ស័យ២នាក់មិនឈប់ឡើយហើយបានព្យាយាមគេចខ្លួន តែត្រូវសមត្ថកិច្ចដេញចាប់បានម្នាក់ ដោយឡែកម្នាក់ទៀតបន្តជិះម៉ូតូគេចខ្លួនរហូតមកដល់ជិតប៉ុស្តិ៍នគរបាលចោមចៅទី៣ ទេីបសមត្ថកិច្ចដេញចាប់បានតែម្តង។នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានធ្វេីសកម្មភាពឆក់យកកាបូបស្ត្រីរងគ្រោះប្រាកដមែន ទេីបសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌដេីម្បីចាត់ការបន្ត៕
ដោយ៖សុខ ខេមរា
