សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ ផ្សារសាមគ្គីហៅ (ផ្សារប៉ាហ៊ី) ស្ថិតនៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន រហូតមកដល់ថ្ងៃទី០៤ ខែកក្កដា ឆ្នាំ២០២១នេះត្រូវបានអាជ្ញាធរបន្តបិទបន្ថែម១៤ថ្ងៃទៀត ក្រោយពីសង្កេតឃើញមានអាជីវករមួយចំនួន ដែលលក់ដូរនៅក្នុងផ្សារនេះល្មើសនឹងបំរាម ដោយនាំគ្នាទៅបើកតូបលក់ដូរ មុនថ្ងៃប្រកាសឲ្យបើកដំណើរការ។
មន្រ្តីរដ្ឋបាលក្រុងប៉ៃលិនបានឲ្យដឹងថា ហេតុការណ៍ហ៊ុំព័ទ្ធខ្សែពណ៌លឿង បិទខ្ទប់បន្ថែម ១៤ថ្ងៃទៀតនេះ គឺធ្វើឡើង កាលពីព្រឹកថ្ងៃទី៤ ខែកក្កដា ឆ្នាំ២០២១ ម្សិលមិញនេះ ក្រោយពីបិទអស់រយៈពេល ១៥ថ្ងៃមកហើយ គឺចាប់បិទផ្សារតាំងពីថ្ងៃទី១៨ ខែមិថុនា ឆ្នាំ២០២១ ដោយគ្មានថ្ងៃកំណត់ ក្រោយពីរកឃើញអាជីវករ កើតមានជំងឺកូវីដ-១៩ ហើយមកដល់ពេលនេះមានអាជីវករមួយចំនួនមិនគោរពតាមការណែនាំដោយនាំគ្នាបើកតូបលក់ដូរដោយសេរី។
ក្រុមអាជីវករខ្លះ បានឲ្យដឹងថា ពួកគាត់ទទួលបានដំណឹងតៗគ្នាថា ខាងគណ:កម្មការផ្សារ ឲ្យមក រៀបចំបោសសម្អាតតូប និងត្រៀមលក់ដូរឡើងវិញ ទើបពួកគាត់នាំគ្នា មកបើកបន្តបន្ទាប់គ្នាតែម្តង។ ម្យ៉ាងវិញទៀត ដោយសង្កេតឃើញ មានអ្នកខ្លះ មកបើកតូបលក់ធម្មតា ព្រោះព្រួយបារម្ភពីជីវភាពប្រចាំថ្ងៃ។
លោក អ៊ុន ប៊ុនលី នាយករដ្ឋបាលសាលាខេត្តប៉ៃលិន បានប្រាប់ថា ដោយគេមិនទាន់គ្រប់គ្រងការរីករាលដាលនៃជំងឺកូវីដ-១៩ នៅក្នុងផ្សារនេះ បានទាំងស្រុងនៅឡើយទេ ហើយបើចង់ដឹងច្បាស់លោកឲ្យទៅសួរនាំខាងរដ្ឋបាលក្រុងប៉ៃលិនវិញ។
ចំណែក លោក ស៊ុន យី អភិបាលក្រុងប៉ៃលិន បានឲ្យដឹងថា មូលហេតុ ដែលអាជ្ញាធរ បិទខ្ទប់បន្តទៀត ព្រោះ ទី១. ដោយសារតែនៅក្នុងផ្សារ អាចមានករណីឆ្លងបន្តទៀត ទើបធ្វើចត្តាឡីស័ក ផ្សារបន្ថែម ១៤ថ្ងៃបន្ថែម និងទី២. ដោយសារអាជីវករបំពានវិធានការរបស់ក្រសួងសុខាភិបាល នាំគ្នាលក់មុនថ្ងៃកំណត់។
ក្រុមអាជីវករលាន់មាត់ថា ការបិទ ដើម្បីទប់ស្កាត់ការរីករាលដាលជំងឺកូវីដ-១៩ គឺជាការល្អ ពួកគាត់មានការគាំទ្រ តែបើជាការបិទ ព្រោះតែខឹងក្តៅក្រហាយជាមួយនឹងអាជីវករមួយចំនួន ដែលបំពាននូវវិធានរបស់ក្រសួងសុខាភិបាល គឺវាពិតជាប៉ះពាល់ដល់ជីវភាពអាជីវករមួយចំនួនធំ ដែលពួកគាត់គោរពតាមវិធានសុខាភិបាលសុខចិត្តបិទទ្វារតូបរហូត ១៥ថ្ងៃមកហើយនោះ៕
ដោយ ៖ ស សារ៉េត
