សារព័ត៌មាន នគរវត្ត តែងតែនាំមុខគេជានិច្ច
ខ្សែបំរើ ស្លាបសញ្ជាតិព័រទុយហ្គាល់ Francisco Trincao របស់ក្រុម Barcelona បានមកចូលរួមលេងជាមួយនឹងក្រុមចចករោមមាសWolves របស់អង់គ្លេសក្នុងលក្ខណៈខ្ចីជើងពេញមួយរដូវកាល។
គេហទំព័រផ្លូវការរបស់ក្លិប Wolves បានប្រកាសថា Francisco Trincaoគឺជាកីឡាករទី២ហើយដែលក្លិបបានទិញយកមកពង្រឹងក្លិបសម្រាប់រដូវកាលថ្មី បន្ទាប់ពីកីឡាករ Yerson Mosquera ខ្សែការពារសញ្ជាតិកូឡុំប៊ី។
លោក Bruno Lageគ្រូបង្វឹកថ្មីរបស់ក្លិបWolvesបាននិយាយកោតសសើរដល់កីឡាករFrancisco Trincao ថា “អ្នកគាំទ្រប្រាកដជាជក់ចិត្តមើលការលេងរបស់គាត់ដោយគាត់ជាកីឡាករមានទេពកោសល្យខ្ពស់និងលេងបានល្អនៅលើទីលានប្រកួត។ ពួកយើងបានសំលឹងឃើញគាត់ជាយូរណាស់មកហើយ។ គាត់ទើបតែ២១ឆ្នាំទេ តែបានបង្ហាញខ្លួនជាច្រើនប្រកួតនៅក្របខ័ណ្ឌកំពូលរបស់អេស្ប៉ាញ ហើយខ្ញុំជឿថាគាត់នឹងត្រៀមខ្លួនរួចរាល់ចំពោះការលេងនៅអង់គ្លេស។”
Francisco Trincao បានបង្ហាញខ្លួនចំនួន២៨ប្រកួតជាមួយនឹងក្រុម Barcelona កាលពីរដូវកាលចាស់ដោយស៊ុតបាល់បញ្ចូលទីបាន៣គ្រាប់។ គាត់បានផ្លាស់ពីក្រុម Braga របស់ប្រទេសព័រទុយហ្គាល់មកកាន់អេស្ប៉ាញកាលពីឆ្នាំ២០២០ ៕
ដោយ៖ ភារៈ
