សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានរងរបួសធ្ងន់ ហេីយត្រូវរថយន្តសាមុយដឹកបញ្ជូនទៅកាន់មន្ទីរពេទ្យភ្លាមៗ បន្ទាប់ពីជិះម៉ូតូPCX ទៅបុករថយន្តស៊េរីទំនេីបHAWTAIកំពុងឆ្លងផ្លូវពេញទំហឹង កាលពីវេលាម៉ោង១២ និង១០នាទីរំលងអាធ្រាត្រ ឈានចូលថ្ងៃទី១៥ ខែកក្កដា ឆ្នាំ២០២១ នៅចំណុចមុខអគារភ្លោះពាណិជ្ជកម្ម តាមបណ្ដោយផ្លូវព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុមានរថយន្តស៊េរីទំនេីបមួយគ្រឿងម៉ាក HAWTAI ពណ៌ឈាមជ្រូក ពាក់ស្លាកលេខភ្នំពេញ 2AU-5772 បេីកបរដោយបុរសម្នាក់ជាជនជាតិចិន ធ្វេីដំណេីរចេញពីផ្លូវបេតុង នៃអគារភ្លោះពាណិជ្ជកម្ម បំណងឆ្លងកាត់ផ្លូវព្រះនរោត្ដមទៅទិសខាងជេីង តែបានពាក់កណ្ដាលផ្លូវស្រាប់តែមានបុរសម្នាក់ជិះម៉ូតូមួយគ្រឿងម៉ាក PCX ពណ៌ស ពាក់ស្លាកលេខភ្នំពេញ 1HR-9036 ធ្វេីដំណេីរតាមបណ្ដាលផ្លូវព្រះនរោត្ដម ទិសដៅពីជេីងមកត្បូងក្នុងល្បឿនលឿន បានជ្រុលទៅបុករថយន្តស៊េរីទំនេីបខាងលេីកំពុងឆ្លងផ្លូវចំថ្ពាល់ខាងឆ្វេងពេញទំហឹង បណ្ដាលឲ្យម៉ូតូដួលខ្ទាតចេញពីរថយន្តជិត១០ម៉ែត្រនិងធ្វេីឲ្យអ្នកជិះម៉ូតូរងរបួសធ្ងន់ ។
ក្រោយកេីតហតុភ្លាមៗ ជនរងគ្រោះភាគីខាងម៉ូតូត្រូវបានថយន្តសាមុយដឹកបញ្ជូនទៅកាន់មន្ទីរពេទ្យ ។ ចំណែកភាគីខាងរថយន្តមិនបេីកចេញពីកន្លែងកេីតហេតុឡេីយ ដោយរង់ចាំសាច់ញាតិជនរងគ្រោះ និងសមត្ថកិច្ចមូលដ្ឋានមកជួយដោះស្រាយ ។ ចុងក្រោយភាគីខាងរថយន្តព្រមសងថ្លៃព្យាបាលរបួសនិងការខូចខាតម៉ូតូចំនួន២.២៥០$ឲ្យទៅឪពុកម្ដាយជនរងគ្រោះភាគីខាងម៉ូតូ ដេីម្បីបញ្ចប់រឿងនៅនឹងកន្លែងតែម្ដង ៕
ដោយ ៖ ភារ៉ា ដង្កោ
