សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យម្នាក់បានឡើងរកលួចទ្រព្យសម្បត្តិប្រជាពលរដ្ឋ ប៉ុន្តែបែរជាប៉ះចំផ្ទះអ្នកដែលកំពុងតែធ្វើចត្តាឡីស័ក ក៏ត្រូវឃាត់ខ្លួនបាន រួចប្រគល់ឱ្យសមត្ថកិច្ចចាត់ការភ្លាមៗ តែសមត្ថកិច្ចមិនហ៊ានទទួលទេ ព្រោះតែខ្លាចឆ្លងរាលដាលពេញប៉ុស្តិ៍សមត្ថកិច្ច ទើបចុងក្រោយម្ចាស់ផ្ទះក៏សម្រេចចិត្តដោះលែងវិញ ។
ករណីនេះបង្កឱ្យមានការភ្ញាក់ផ្អើលកាលពីវេលាម៉ោង៤ទៀបភ្លឺឈានចូលថ្ងៃទី១៥ ខែកក្កដា ឆ្នាំ២០២១ ជិតនឹងប៉ុស្តិ៍នគរបាលរដ្ឋបាលចាក់អង្រែក្រោម ផ្លូវជាតិលេខ២ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ។
ប្រភពព័ត៌មានបានឱ្យដឹងថា ជនសង្ស័យដែលឃាត់ខ្លួនបានខាងលើនេះមិនបានឱ្យស្គាល់អត្តសញ្ញាណនោះឡើយ ។
តាមសម្តីបងប្អូនប្រជាពលរដ្ឋដែលនៅក្បែាខាងបានឱ្យដឹងថា មុនពេលកើតហេតុ ម្ចាស់ផ្ទះ រួមទាំងក្រុមគ្រួសារ បានស្ថិតនៅក្រោមការធ្វើចត្តាឡីស័ក និងបាននាំគ្នាសម្រាកលង់លក់ក្នុងដំណេកដូចសព្វដង ។លុះមកដល់ម៉ោងកើតហេតុ ក៏ស្រាប់តែមានបងប្អូនប្រជាពលរដ្ឋដែលធ្វើដំណើរឆ្លងកាត់មុខផ្ទះនោះដែលស្ថិតនៅតាមបណ្ដោយផ្លូវជាតិលេខ២ ជិតប៉ុស្តិ៍នគរបាលចាក់អង្រែក្រោម បានប្រទះឃើញជនសង្ស័យកំពុងតែចងខ្សែទម្លាក់អីវ៉ាន់របស់របរផ្សេងៗចុះមកខាងក្រោម ក៏ស្រែកធ្វើឲ្យមានការភ្ញាក់ផ្អើល។
ប្រភពខាងលើបានបន្តថា ដោយមានការសង្ស័យទើបបងប្អូនប្រជាពលរដ្ឋដែលឆ្លងកាត់ទីនោះបានស្រែកថា «ចោរៗ» ធ្វើអោយផ្អើលដល់ជនសង្ស័យលោតចុះមកក្រោម រួចរត់គេចខ្លួនតែម្តង។ ប៉ុន្តែពេលនោះក៏ត្រូវបានបងប្អូនប្រជាពលរដ្ឋនាំគ្នាដេញតាមចាប់ឃាត់ខ្លួនបានមកវិញ រួចក៏ទំនាក់ទំនងហៅសមត្ថកិច្ចឱ្យមកយកជនសង្ស័យទៅប៉ុស្តិ៍។
ពេលសមត្ថកិច្ចប៉ុស្តិ៍នគរបាលចាក់អង្រែក្រោមបានមកដល់ ហើយក៏ដឹងថា ជនសង្ស័យរូបនេះបានឡើងទៅលួចសម្ភារៈចំផ្ទះដែលកំពុងតែធ្វើចត្តាឡីស័កនោះ ក៏បានរាយការណ៍តាមទូរស័ព្ទទៅថ្នាក់លើ ហើយក៏ត្រូវថ្នាក់លើប្រាប់ថាមិនហ៊ានឃាត់ខ្លួនជនសង្ស័យរូបនោះទេ ព្រោះយកទៅសួរនាំទៅខ្លាចឆ្លងរាលដាលពេញប៉ុស្តិ៍នគរបាល ។
ជនសង្ស័យរូបនោះក៏បានសារភាពថា រូបគេពិតជាបានឡើងលួចទ្រព្យសម្បត្តិ ផ្ទះដែលកំពុងធ្វើចត្តាឡីស័កមែន ហើយពេលនោះដែរ ម្ចាស់ផ្ទះឃើញថាមិនទាន់មានបាត់បង់របស់អ្វីធំដុំ ក៏សម្រេចចិត្តដោះលែងជនសង្ស័យរូបនោះឱ្យមានសេរីភាពវិញតែម្តង៕
ដោយ ៖ អរុណរះ
