សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ នៅព្រឹកថ្ងៃទី១៥ ខែកក្កដា ឆ្នាំ២០២១ នាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ បានអញ្ជើញចុះពិនិត្យមើលការព្យាបាលជំងឺកូវីដ-១៩ និងការធ្វើចត្តាឡីសក័តាមបណ្តាកងឯកភាពមួយចំនួនក្នុងកងយោធពលខេមរភូមិន្ទ។
តាមសេចក្តីរាយការណ៍របស់គណៈគ្រប់គ្រងសាលា បច្ចុប្បន្ននេះនៅវិទ្យាស្ថានកងទ័ពជើងគោកមានយោធិនកំពុងសម្រាកព្យាបាលជំងឺកូវីដ-១៩ ចំនួន ៦៩ នាក់ និងយោធិនចំនួន ៣៦ នាក់ កំពុងធ្វើចត្តាឡីស័ក។ ដោយឡែកនៅសាលានាយទាហានសកម្ម មានយោធិនចំនួន ៣១៧ នាក់ កំពុងសម្រាកព្យាបាល និងយោធិនចំនួន ៤៨៤ នាក់ កំពុងធ្វើចត្តាឡីស័ក។
មានប្រសាសន៍ក្នុងឱកាសនោះ នាយឧត្តមសេនីយ៍ វង្ស ពិសេន បានសំដែងនូវក្តីមោទនៈចំពោះពលិកម្មរបស់កងយោធពលខេមរភូមិន្ទ ដែលបានចូលរួមយុទ្ធនាការជាតិចាក់វ៉ាក់សាំងជូនប្រជាពលរដ្ឋ ក៏ដូចជាលទ្ធភាពនៅក្នុងការរៀបចំកន្លែងព្យាបាលជំងឺកូវី-១៩ កម្រិតស្រាលដោយខ្លួនឯង។
នាយឧត្តមសេនីយ៍អគ្គមេបញ្ជាការបានក្រើនរំលឹកឲ្យថ្នាក់ដឹកនាំសាលា ត្រូវបង្កើនការយកចិត្តទុកដាក់គ្រប់គ្រងកម្លាំងឱ្យបានម៉ឺងម៉ាត់បំផុត ដើម្បីទប់ស្កាត់ការរាតត្បាតជំងឺកូវីដ-១៩។
លោកនាយឧត្តមសេនីយ៍បានបញ្ជាក់ថា ការអនុញ្ញាតច្បាប់ដល់យោធិនគ្រប់រូប ធ្វើបានតែក្នុងករណីមានធុរៈចាំបាច់ប៉ុណ្ណោះ ដែលមេបញ្ជាការកងឯកភាពនីមួយៗ ត្រូវពិនិត្យ និងអនុញ្ញាតក្នុងរយៈពេលសមស្រប ហើយពេលត្រឡប់មកវិញក៏ត្រូវធ្វើចត្តាឡីស័កក្នុងកងឯកភាពរបស់ខ្លួនរយៈពេល២១ថ្ងៃជាកំណត់ផងដែរ។
បន្ថែមលើនេះ លោកអគ្គមេបញ្ជាការ ក៏បានដាក់បទបញ្ជាឱ្យកងឯកភាពនីមួយៗ ត្រូវត្រួតពិនិត្យរាល់កម្លាំងចេញចូលឱ្យបានច្បាស់លាស់ ទាំងកម្លាំងចេញបេសកកម្ម ច្បាប់ ទាំងកម្លាំងទៅទិញសម្ភារៈ ម្ហូបអាហារជាដើម ដែលបញ្ហានេះត្រូវចាត់តាំងកម្លាំងនៅខាងក្រៅ និងខាងក្នុងឱ្យដាច់ពីគ្នា ។
ទន្ទឹមនោះនាយឧត្តមសេនីយ៍ វង្ស ពិសេន បានផ្តាំផ្ញើដល់ថ្នាក់ដឹកសាលា ត្រូវបង្កើនការអបរំ ការណែនាំអនុវត្តឱ្យបានម៉ឺងម៉ាត់នូវវិធានការ ៣កុំ ៣ការពារ ហើយសូមអនុវត្តចលនានេះឱ្យបានជាប់ជាប្រចាំនៅតាមកងឯកភាពនីមួយៗ។
នៅក្នុងឱកាសចុះត្រួតពិនិត្យនោះ នាយឧត្តមសេនីយ៍ វង្ស ពិសេន ក៏បាននាំយកសម្ភារ បរិក្ខារពេទ្យ និងថវិកាមួយចំនួនទៅឧបត្ថម្ភដល់នាយទាហាន នាយទាហានរង និងពលទាហាន ដែលកំពុងទទួលការព្យាបាល និងធ្វើចត្តាឡីស័កផងដែរ៕
ដោយ៖ សូរិយា
