សារព័ត៌មាន នគរវត្ត តែងតែនាំមុខគេជានិច្ច
ប្រព័ន្ធផ្សព្វផ្សាយអង់គ្លេសបានរាយការណ៍ថា លោក Lewis Hamilton បានទទួលរងការរំលោភបំពានប្រកាន់ជាតិសាសន៍តាមប្រព័ន្ធអុីនធើណេតបន្ទាប់ពីបានឈ្នះពានរង្វាន់ Grand Prix កាលពីថ្ងៃអាទិត្យ ទី១៨ កក្កដាកន្លងទៅ។
យោងតាមការចេញផ្សាយរបស់សារព័ត៌មានរ៉យទ័របានឲ្យដឹងថា ម្ចាស់ជើងឯកប្រណាំងរថយន្តពិភពលោក Formula 1 ៧សម័យកាលបានឈ្នះជាលើកទី៨ក្នុងការប្រណាំងបន្ទាប់ពីបានយកឈ្នះរយៈពេល១០វិនាទីលើគូប្រជែង Max Verstappen ។
សារព័ត៌មាន Sky Sports ក៏បានរាយការណ៍ដែរថា លោក Hamilton វ័យ៣៦ឆ្នាំត្រូវបានគេកំណត់គោលដៅតាមអុីនធើណេតជាច្រើនម៉ោងបន្ទាប់ពីទទួលបានជ័យជំនះដោយមានសារប្រកាន់ជាតិសាសន៍រាប់បញ្ចូលទាំងរូបសត្វស្វាដែលត្រូវបានផ្ញើទៅក្នុងសារឆ្លើយតបរបស់ក្រុម Mercedes នៅលើ Instagram ផងដែរ។
ប្រព័ន្ធទំនាក់ទំនង Instagram ដែលជាកម្មសិទ្ធិរបស់ក្រុមហ៊ុនហ្វេសប៊ុកមិនបានឆ្លើយតបភ្លាមៗទៅនឹងការស្នើសុំរបស់សារព័ត៌មានរ៉យទ័រដើម្បីសុំការអត្ថាធិប្បាយទេ។
Hamilton ជាអ្នកតស៊ូមតិដោយសំងាត់ដើម្បីយុត្តិធម៌សង្គម និងស្ថិតក្នុងចំណោមអ្នកគាំទ្រចលនាប្រឆាំងការរើសអើងជាតិសាសន៍ផងដែរ។គាត់បាននិយាយមុនពេលប្រណាំងថា គាត់ត្រូវបានបំផុសគំនិតដោយប្រតិកម្មរបស់កីឡាករបាល់ទាត់អង់គ្លេសទៅនឹងការរំលោភបំពានជាតិសាសន៍បន្ទាប់ពីការស៊ុតបាល់ប៉េណាល់ទីរបស់ពួកគេចាញ់ក្រុមអុីតាលីនៅក្នុងវគ្គផ្តាច់ព្រ័ត្រជើងឯកទ្វីបអឺរ៉ុប។
ពាក់ព័ន្ធនឹងករណីខាងលើ នាយករដ្ឋមន្រ្តីអង់គ្លេសលោក Boris Johnson បានជួបជាមួយក្រុមហ៊ុនប្រព័ន្ធផ្សព្វផ្សាយសង្គមកាលពីសប្តាហ៍មុនដើម្បីស្នើសុំឱ្យពួកគេបង្កើនការប្រយុទ្ធប្រឆាំងនឹងការរំលោភបំពានជាតិសាសន៍តាមប្រព័ន្ធអុីនធើណេត ៕
ដោយ៖ ភារៈ(រូបភាព៖ Reuters)
