សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Lionel Messi បានបង្ហាញខ្លួនលើកដំបូងនៅ Paris St-Germain ក្នុងនាមជាកីឡាករបម្រុងដែលត្រូវបានដូរចូលនៅនាទីទី៦៦ ក្នុងជ័យជម្នះ ២-០ នៅលើទឹកដីក្រុម Reims ក្នុងក្របខ័ណ្ឌ Ligue 1 ។
កីឡាករសញ្ជាតិអាហ្សង់ទីនរូបនេះពាក់អាវលេខ៣០ថ្មីរបស់ក្លិប PSG បានទទួលការអបអរសាទរ ខណៈដែលគាត់បានជំនួសមិត្តចាស់របស់គាត់គឺ Neymar នៅចំពោះមុខហ្វូងមនុស្សនៅក្នុងកីឡដ្ឋាន។ វាជាការប្រកួតក្លិបដំបូងក្នុងអាជីពរបស់គាត់សម្រាប់ក្រុមផ្សេងក្រៅពីបាសេឡូណា។
គ្រូបង្វឹកលោក Mauricio Pochettino បាននិយាយថា “គាត់នៅឆ្ងាយពីទម្រង់លេងល្អបំផុតរបស់គាត់ ប៉ុន្តែគាត់បានហ្វឹកហាត់យ៉ាងល្អ ហើយគាត់នឹងមានសុខភាពល្អក្នុងរយៈពេលពីរសប្តាហ៍ខាងមុខនេះ។ យើងកំពុងរង់ចាំអ្វីដែលល្អបំផុតពីគាត់ ខ្ញុំសប្បាយចិត្តណាស់ដែលគាត់បានបង្ហាញខ្លួនលើកដំបូង ដែលវាមានសារៈសំខាន់ខ្លាំងណាស់សម្រាប់គាត់។ គាត់ល្អតាំងពីប៉ះលើកដំបូងគាត់បានផ្តល់ភាពស្ងប់ចិត្តដល់ក្រុម ហើយវាល្អសម្រាប់គាត់ក្នុងការចាប់ផ្តើមជាមួយនឹងជ័យជម្នះ។
ខ្សែប្រយុទ្ធ Kylian Mbappe បានរកគ្រាប់បាល់ទាំង២គ្រាប់ក្នុងជ័យជម្នះខាងលើ ស្របពេលដែលលេចឮទៅក្លិប Real Madrid មានបំណងចង់ចុះហត្ថលេខាជាមួយគេមុនថ្ងៃកំណត់ផ្ទេរនៅថ្ងៃអង្គារនេះ។ Real Madrid បានធ្វើការដេញថ្លៃ១៦០លានអឺរ៉ូ ដើម្បីចុះហត្ថលេខាលើកីឡាករវ័យ២២ឆ្នាំរូបនេះដែលឥឡូវនេះរកបាន១៣៥គ្រាប់ក្នុង១៧៥ប្រកួតសម្រាប់ PSG ។
គ្រាប់បាល់ទីមួយរបស់កីឡាកររូបនេះគឺការបញ្ជូនបាល់របស់ Angel di Maria នៅនាទីទី១៦ ហើយសម្រាប់គ្រាប់បាល់ទី២ គឺជាការបញ្ចូនបាល់របស់ Achraf Hakimi នៅនាទីទី៦៣។
សំបុត្រសម្រាប់ការប្រកួតនេះត្រូវបានគេលក់បន្តក្នុងតម្លៃប្រហែល៦.០០០អឺរ៉ូបន្ទាប់ពីក្រុម Reims បានលក់សំបុត្រជាង២០.០០០ សន្លឹកសម្រាប់ការប្រកួតនេះ។ មុនការចុះហត្ថលេខារបស់ Messi មានតែប្រហែល៦.០០០សន្លឹកប៉ុណ្ណោះដែលត្រូវបានលក់។ អ្នកទស្សនាប្រហែលជាខកចិត្តដែលឃើញ Messi មានឈ្មោះតែនៅលើកៅអីអង្គុយទោះបីគាត់ទទួលបានការបញ្ចេញសំឡេងនៅពេលដែលគាត់នៅក្នុងទីលាន ដោយមានអ្នកគាំទ្រស្រែកដាក់ឈ្មោះគាត់ និងហ៊ោកញ្ច្រៀវនៅពេលគាត់ឡើងមក។
Messi បានខកខានការប្រកួតពីរបីលើកដំបូងសម្រាប់ PSG ចាប់តាំងពីការផ្លាស់ប្តូរកីឡាកររបស់គាត់ បន្ទាប់ពីគាត់ចាកចេញពី Barcelona ។ នេះគឺជាការប្រកួតលើកដំបូងរបស់គេចាប់តាំងពីឈ្នះពាន Copa America ជាមួយអាហ្សង់ទីនកាលពីខែកក្កដា។ គាត់បានចូលរួមជាមួយក្រុម Barcelona តាំងពីអាយុ១៣ឆ្នាំ ហើយស៊ុតបញ្ចូលទីបាន៦៧២គ្រាប់ក្នុង៧៧៨ ប្រកួតសម្រាប់ក្លិប។ គាត់បានឈ្នះពានរង្វាន់ Ballons d’Or ចំនួន៦ដែលជាកំណត់ត្រាមួយ ហើយត្រូវបានគេចាត់ទុកថាជាកីឡាករបាល់ទាត់ដ៏អស្ចារ្យម្នាក់ដែលមិនធ្លាប់មាន ៕
ដោយ៖ ភារៈ(រូបភាព ៖ BBC Sport)
