សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបានកេីតឡេីង បន្ទាប់ពីក្មេងប្រុស ២នាក់ បងប្អូនជីដូនមួយ បាននាំគ្នាទៅស្ទូចត្រីនៅវាលស្រែ បែរជានាំគ្នាចុះទៅងូតទឹកប្រឡាយ បណ្ដាលឱ្យលង់ទឹកស្លាប់ទាំង២នាក់ កាលពីវេលាម៉ោង៣រសៀលថ្ងៃទី១១ ខែកញ្ញា ឆ្នាំ២០២១ នៅតាមបណ្ដោយផ្លូវរថភ្លើងខ្សែភ្នំពេញ-បាត់ដំបង ស្ថិតនៅក្នុងភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
នេះបេីយោងតាមប្រភពព័ត៌មានពីអ្នកភូមិនៅកន្លែងកើតហេតុ បាននិយាយថា ក្មេងប្រុសដែលស្លាប់ខាងលើនេះទី១,មានឈ្មោះ ហ័រ អាយុ៦ឆ្នាំ មានទីលំនៅក្រុងតាខ្មៅ ខេត្តកណ្ដាល ហើយបានមកលេងផ្ទះបងប្អូនជនរងគ្រោះទី២,មានត្រូវជាបងជីដូនមួយឈ្មោះ សេង ហុង អាយុ៧ឆ្នាំ បានមកលេងផ្ទះបងប្អូន ២ទៅ៣ថ្ងៃកន្លងមកហើយ ។ ដោយទីតាំងកេីតហេតុមានជម្រៅប្រមាណជាង៣ម៉ែត្រឯណោះ ដែលអាជ្ញាធរទើបតែកាយស្ដាររួចថ្មីៗ ដើម្បីរំដោះទឹកកុំឲ្យលិចលង់ស្រូវ និងភូមិឋាននៅតំបន់នោះ។
ប្រភពដដែល បានបន្តទៀតថាថា នៅមុនពេលកើតហេតុឪពុកម្ដាយបានជាប់រវល់ទៅរកស៊ី ហើយបានទុកឲ្យក្មេងប្រុសទាំង២នាក់ នៅជាមួយបងស្រីម្នាក់ទៀតអាយុ១០ឆ្នាំ ។ ប៉ុន្តែដោយបងស្រីជាប់រវល់ទៅរៀន ទើបក្មេងប្រុសរងគ្រោះនៅផ្ទះតែ២នាក់ លុះដល់វេលាម៉ោង១រសៀល ថ្ងៃកើតហេតុបាននាំគ្នាទៅស្ទូចត្រីនៅត្រង់ចំណុចខាងលើ ស្ថិតនៅចម្ងាយប្រមាណជាង៥០ម៉ែត្រប៉ុណ្ណោះ ក៏ស្រាប់តែបាត់រហូតមិនឃើញត្រឡប់ទៅផ្ទះវិញសោះ ។ភ្លាមនោះដោយសារតែមានការងឿងឆ្ងល់ អ្នកជិតខាងបាននាំគ្នាទៅរកមើលហើយបានប្រទះឃើញស្បែកជើង២គូរនៅមាត់ប្រឡាយ។
បន្ទាប់មកប្រជាពលរដ្ឋនាំគ្នារាយការណ៍ទៅសមត្ថកិច្ចមូលដ្ឋាន និងយកអួនទៅអូស និងបង់សំណាញ់ ស្រាប់តែជាប់ក្មេងប្រុសឈ្មោះ ហ័រ ដែលជាប្អូនមុន។ ចំណែកឯក្មេងប្រុសឈ្មោះ ហុង ដែលត្រូវជាបងប្រុសជីដូនមួយ រហូតដល់វេលាម៉ោង៨យប់ ថ្ងៃដដែលនេះពុំទាន់រកឃើញនៅឡើយនោះទេ។ ទេីបអ្នកភូមិ និងអជ្ញាធរបាននាំត្រឡប់ទៅផ្ទះសិន រង់ចាំថ្ងៃស្អែកទើបរាវរកសពជនរងគ្រោះបន្តទៀត៕
ដោយ៖សហការី
