សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ទីតាំងតារាងបាល់មួយកន្លែងក្នុងមូលដ្ឋានខណ្ឌទួលគោកដែលបង្កប់ល្បែងសុីសងខុសច្បាប់ បង្កឲ្យមានសំឡេងខ្លាំងៗធ្វេីឱ្យប៉ះពាល់ដល់អ្នកជិតខាងត្រូវបានកម្លាំងសមត្ថកិច្ចចុះបង្រ្កាបហើយឃាត់មនុស្ស២នាក់ភ្លាមៗ។
ប្រតិបត្តិការចុះបង្រ្កាបនេះធ្វើឡើងកាលពីរសៀលថ្ងៃទី២០ ខែកញ្ញា ឆ្នាំ២០២១ ស្ថិតនៅតាមបណ្តោយផ្លូវបេតុង ក្នុងភូមិ៣ សង្កាត់បឹងសាឡាង ខណ្ឌទួលគោក រាជធានីភ្នំពេញ។
បេីតាមប្រភពព័ត៌មានពីលោកវរសេនីយ៍ឯក ពុំ ទូច នាយផ្នែកព្រហ្មទណ្ឌខណ្ឌទួលគោក បានឱ្យដឹងនៅរសៀលថ្ងៃចន្ទទី២០ ខែកញ្ញា ឆ្នាំ២០២១នេះថា៖ កម្លាំងសមត្ថកិច្ចជំនាញ ដឹកនាំដោយលោក សឿ ឡងឌី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះឃាត់ខ្លួនមនុស្សស្រីចំនួន២នាក់ យកមកសាកសួរនៅអធិការដ្ឋាននគរបាលខណ្ឌដេីម្បីបន្តនីតិវិធី បន្ទាប់ពីមានប្រជាពលរដ្ឋរាយការណ៍ថាទីតាំងមួយនេះរំខានពួកគាត់ខ្លាំងណាស់ដោយមានលាន់ឮសំឡេងខ្លាំងៗធ្វេីឱ្យពិបាកក្នុងការរស់នៅ។
ជុំវិញបញ្ហានេះដែរ លោកវរសេនីយ៍ឯក សុខ ហេង អធិការនគរបាលខណ្ឌទួលគោក ក៏បានឱ្យដឹងដែរថា ចំពោះការឃាត់ខ្លួនមនុស្ស២នាក់ដែលជាប់ពាក់ព័ន្ធនឹងករណីឆ្នោតឡូតូនេះ ចាំមេីលគោលការណ៍របស់លោក សឿ ឡងឌី ព្រះរាជអាជ្ញារងសាលាដំបូងរាជធានីភ្នំពេញ អនុវត្តវិធានការយ៉ាងម៉េចបន្តទៀត។
បច្ចប្បន្នជនសង្ស័យដែលត្រូវបានកម្លាំងសមត្ថកិច្ចឃាត់ខ្លួន ត្រូវបានបញ្ជូនទៅកាន់អធិការដ្ឋាននគរបាលខណ្ឌទួលគោក ដើម្បីធ្វើការសាកសួរបន្ត៕
ដោយ ៖ រ៉ារ៉ា
