សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យ៉ាងហោចណាស់មនុស្សប្រុសស្រី៤នាក់បានរងរបួសធ្ងន់ស្រាលដោយសារករណីគ្រោះថ្នាក់ចរាចរណ៍អ្នកបើកម៉ូតូហុងដាសេ១២៥ បត់ឆ្វេងមិនប្រយ័ត្នបុកជាមួយម៉ូតូទិសដៅបញ្ច្រាសទិសគ្នាពេញទំហឹងបង្កការភ្ញាក់ផ្អើលតែម្ដង។
ហេតុការណ៍នេះបានកើតឡើងកាលពីវេលាម៉ោង៦និង២៣នាទីក្បាលព្រលប់ថ្ងៃទី៣០ខែកញ្ញា ឆ្នាំ២០២១ លើផ្លូវ៣៣៤ចំណុចភូមិព្រៃសង្កែ ឃុំ ខ្សែត្រ ស្រុកកំពង់រោទិ៍ ខេត្តស្វាយរៀង។
សមត្ថកិច្ចនគរបាលបានឱ្យដឹងថាអ្នកបើកម៉ូតូបង្កហេតុ មានឈ្មោះវ៉ង សាខន ភេទស្រីអាយុ៣៥ឆ្នាំ អ្នករួមដំណើរឈ្មោះ វៀង ផានម៉ៃ ភេទស្រី អាយុ១៨ឆ្នាំ និងឈ្មោះ វៀង វីន ភេទប្រុស អាយុ៦ឆ្នាំ អ្នកទាំង៣ មានទីលំនៅភូមិ ព្រៃសង្កែ ឃុំខ្សែត្រ ស្រុកកំពង់រោទ៍ ខេត្ត ស្វាយរៀងជិះម៉ូតូម៉ាកHonda សេ១២៥ ផលិតឆ្នាំ ២០១០ ពណ៌ខ្មៅ ពាក់ស្លាកលេខ ស្វាយរៀង ១B៧៤៤០ ខូចខាតយ៉ាងដំណំ។
ចំណែកអ្នករងគ្រោះមានឈ្មោះរីន សំណាង អាយុ ២៣ឆ្នាំ មានទីលំនៅភូមិត្រពាំងកំពឹស ឃុំ ខ្សែត្រ ស្រុក កំពង់រោទ៍ ខេត្តស្វាយរៀង។
តាមអ្នកភូមិបានឱ្យដឹងថា មុនកើតហេតុមានម៉ូតូមួយគ្រឿងម៉ាកHonda សេ១២៥ ផលិតឆ្នាំ ២០១០ ពណ៌ខ្មៅ ពាក់ស្លាកលេខ ស្វាយរៀង ១B.៧៤៤០ ជិះគ្នា៣នាក់លើផ្លូវ៣៣៤ ហើយក៏បានបត់ឆ្វេងខ្វះប្រុងប្រយ័ត្នស្រាប់តែមានម៉ូតូមួយគ្រឿងម៉ាកExciter ពណ៌ខ្មៅ អត់ស្លាកលេខទិសដៅបញ្ច្រាសគ្នាបុកយ៉ាងពេញទំហឹងបង្កការភ្ញាក់ផ្អើលតែម្ដង។
ក្រោយមកសមត្ថកិច្ចនគរបាលបានមកដល់ធ្វើការវាស់វែងនិងអូសយក វត្ថុតាងទាំងពីរគ្រឿងមករក្សាទុកនៅប៉ុស្តិ៍នគរបាលរដ្ឋបាលខ្សែត្រដើម្បីដោះស្រាយពេលក្រោយតាមច្បាប់ ៕
ដោយ៖យឹម សុថាន
