ព្រះវិហារអ៊ិស្លាមនៅអាហ្វហ្គានីស្ថានរងការវាយប្រហារគ្រាប់បែកបណ្តាលឱ្យស្លាប់និងរបួសជាច្រើន(មានវីដេអូ)

មានករណីវាយប្រហារដោយគ្រាប់បែកទៅលើព្រះវិហារអ៊ិស្លាមនិកាយស៊ីអ៊ីត នៅទីក្រុងកាន់ដាហា ភាគខាងត្បូងអាហ្វហ្គានីស្ថាន បណ្តាលឱ្យមានអ្នកស្លាប់និងរបួសជាច្រើន។ ការវាយប្រហារកើតឡើងនៅព្រះវិហារ Imam Barga ក្នុងទីក្រុងកាន់ដាហា នាថ្ងៃទី១៥ខែតុលា ក្នុងពេលសាសនិកអ៊ិស្លាមកំពុងតែធ្វើពិធីបន់ស្រន់ថ្ងៃសុក្រ។
ប្រព័ន្ធផ្សព្វផ្សាយក្នុងតំបន់បានផ្សាយថា មានអ្នកស្លាប់ជាច្រើន ប៉ុន្តែមិនបានបញ្ជាក់ពីតួលេខនោះឡើយ។ សាក្សីនៅកន្លែងកើតហេតុបានឱ្យដឹងថា តាមតួលេខជាបឋមមានមនុស្ស៧នាក់ស្លាប់និង ១៣នាក់រងរបួស ។ នៅពេលនេះគេមិនទាន់ដឹងពីមូលហេតុនៃការវាយប្រហារទៅលើព្រះវិហារ Imam Barga នៅឡើយទេ ប៉ុន្តែមានព័ត៌មានថាជាការវាយប្រហារអត្តឃាត។
នេះជាករណីវាយប្រហារគ្រាប់បែកអត្តឃាតលើកទីពីរហើយនៅក្នុងប្រទេសអាហ្វហ្គានីស្ថាន ក្នុងរយៈពេលប៉ុន្មានសប្តាហ៍ចុងក្រោយនេះ។ ក្រុម IS-K ដែលជាសាខាក្រុមភេរវកម្មរដ្ឋអ៊ិស្លាមបានប្រកាសទទួលស្គាល់ថាខ្លួនជាអ្នកវាយប្រហារអត្តឃាតនៅព្រះវិហារអ៊ិស្លាមនៅ Kunduz កាលពីសប្តាហ៍កន្លងមក។ ប៉ុន្តែការវាយប្រហារលើកនេះមិនទាន់ មានក្រុមណាមួយចេញមុខទទួលស្គាល់នៅឡើយទេ។
ទីក្រុង កាន់ដាហា ស្ថិតនៅក្រោមការគ្រប់គ្រងរបស់ក្រុមតាលីបង់ ចាប់តាំងពីថ្ងៃទី១៣ខែសីហា ក្រោយពេលក្រុមប្រដាប់អាវុធនេះបើកការវាយប្រហារដណ្តើមទីតាំងគ្រប់គ្រង។
ចំណែកសារព័ត៌មានAljazeeraបានផ្សាយថា ការវាយប្រហារនៅព្រះវិហារ Imam Barga បានសម្លាប់មនុស្សដល់ទៅ៣២នាក់ និងរបួស៤៥នាក់៕ ដោយ៖ធីរីណា

រូបថត៖RT