សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារព័ត៌មានចិនស៊ីនហួ នៅថ្ងៃអាទិត្យទី៣១ ខែតុលា ឆ្នាំ២០២១នេះ បានដកស្រង់ការចេញផ្សាយពីក្រសួងការពារជាតិរុស្ស៊ីដែលបានអះអាងថា៖ កងទ័ពជើងទឹករុស្ស៊ីប្រចាំតំបន់សមុទ្រខ្មៅកំពុងតាមដានសកម្មភាពនាវាពិឃាតអាមេរិក USS Porter ដែលបានធ្វើដំណើរចូលក្នុងដែនទឹកនៃតំបន់សមុទ្រខ្មៅ កាលពីថ្ងៃសៅរ៍ម្សិលមិញនេះ។
បើតាមយោធាអាមេរិកបាននិយាយថា នាវាពិឃាត USS Porter បានធ្វើដំណើរឆ្លងកាត់តំបន់សមុទ្រខ្មៅ ដើម្បីទៅចូលរួមការធ្វើសមយុទ្ធហ្វឹកហាត់ជាមួយសម្ពន្ធមិត្តនៃអង្គការ NATO និងដៃគូនៅក្នុងតំបន់ដើម្បីបង្ហាញការប្ដេជ្ញាចិត្តរបស់ NATO ក្នុងការថែរក្សាសេរីភាពធ្វើនាវាចរណ៍នៅក្នុងតំបន់ដែនទឹកអន្តរជាតិ។
ជុំវិញបញ្ហានេះដែរ រុស្ស៊ី បានបង្ហាញការព្រួយបារម្ភចំពោះការបង្កើនសកម្មភាពយោធារបស់អង្គការ NATO នៅតាមបណ្ដាប្រទេសអឺរ៉ុបខាងកើតដែលស្ថិតនៅក្បែរព្រំដែន របស់ប្រទេសរុស្ស៊ី។ មិនតែប៉ុណ្ណោះ ទីក្រុងមូស្គូ ក៏បានចោទប្រកាន់សហរដ្ឋអាមេរិក និង NATOថា៖ កំពុងប្រែក្លាយតំបន់សមុទ្រខ្មៅទៅជាទីលានប្រឈមមុខដាក់គ្នា ដែលនេះគឺជាជំហានមួយដ៏គ្រោះថ្នាក់អាចបង្កជាជម្លោះយោធា៕ដោយ៖ស តារា
រូបភាពឯកសារ៖ By U.S. Naval
