សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ផ្ទះប្រជាពលរដ្ឋចំនួន១ខ្នងរងការខូចខាតទាំងស្រុង និង១ខ្នងទៀតដែលនៅជិតខាងគ្នាទទួលរងការខូចខាតជញ្ជាំង១ចំហៀង ដោយសារអគ្គិភ័យលេបត្របាក់បណ្ដាលមកពីទុស្សេខ្សែភ្លើង។ ករណីនេះបានកើតឡើងនៅថ្ងៃទី១០ ខែវិច្ឆិកា ឆ្នាំ២០២១ វេលាម៉ោង០៩និង១០នាទី នៅចំណុចភូមិទួលក្ដី ឃុំត្រើយស្លា ស្រុកស្អាង ខេត្តកណ្តាល។
មន្ត្រីនគរបាលស្រុកស្អាងបានឱ្យដឹងថា អគ្គិភ័យបានឆាបឆេះផ្ទះប្រជាពលរដ្ឋមាន២ខ្នង គឺទី១-ម្ចាស់ផ្ទះឈ្មោះ ឡាច សុង ភេទប្រុស អាយុ៧៥ឆ្នាំ ជនជាតិខ្មែរ ត្រូវជាម្ចាស់ផ្ទះធ្វើអំពីឈើ ជញ្ជាំងឈើ ប្រក់ស័ង្កសី ទទឹង៦ម៉ែត្រ បណ្តោយ ៩ម៉ែត្រ (ខូចខាតទាំងស្រុង)។ សម្ភារខូចខាតគឺឆេះរទេះលក់ការ៉េមចំនួន០១គ្រឿង, ឆេះម៉ាសុីនដេរចំនួន០១គ្រឿង, ឆេះម៉ាសុីនបូមទឹកចំនួន ០១គ្រឿង, ឆេះម៉ាសុីនបាញ់ថ្នាំចំនួន ០១គ្រឿង, ឆេះលុយអស់ចំនួន3000$,ខូចខាតស្រូវចំនួន២០បាវនិងសម្ភារប្រើប្រាស់មួយចំនួនទៀត។ ម្ចាស់ផ្ទះទី២- ឈ្មោះហង្ស មាន ភេទប្រុស អាយុ៥១ឆ្នាំ មុខរបរកសិករ ជាផ្ទះឈើ ប្រក់ស័ង្កសី ទទឹង៦ម៉ែត្រគុណ៩ម៉ែត្រ។ សម្ភារខូចខាតរួមមាន : ឆេះជញ្ជាំងផ្ទះមួយចំហៀង។
ប្រភពដដែលបន្តថា បន្ទាប់ពីកម្លាំងនគរបាលប៉ុស្តិ៍រដ្ឋបាលត្រើយស្លាទទួលព័ត៌មានថាមានករណីអគ្គិភ័យឆេះផ្ទះប្រជាពលរដ្ឋនៅភូមិឃុំកើតហេតុខាងលើ ភ្លាមនោះក៏រាយការណ៍ទៅនគរបាលអន្តរាគមន៍ស្រុកស្អាង និងរាយការណ៍បន្តទៅកម្លាំងការិយាល័យពន្លត់អគ្គិភ័យនៃស្នងការដ្ឋាននគរបាលខេត្តកណ្ដាល ដើម្បីជួយធ្វើអន្តរាគមន៍ពន្លត់។ ក្រោយកម្លាំងការិយាល័យខេត្តកណ្ដាលទទួលបានព័ត៌មានភ្លាមបានរាយការណ៍បន្តទៅកម្លាំងពន្លត់អគ្គិភ័យនៃនាយកដ្ឋានក្រសួងមហាផ្ទៃ ដើម្បីមកធ្វើអន្តរាគមន៍ពន្លត់អគ្គិភ័យដែលកំពុងឆាបឆេះដោយប្រើប្រាស់រថយន្តពន្លត់អគ្គិភ័យសរុប៧គ្រឿង ក្នុងនោះរថយន្តពន្លត់អគ្គិភ័យរបស់នាយកដ្ឋានបង្ការពន្លត់អគ្គិភ័យ០២គ្រឿង, រថយន្ដពន្លត់អគ្គិភ័យរបស់ការិយាល័យពន្លត់អគ្គិភ័យខេត្តកណ្ដាលចំនួន០២គ្រឿង, រថយន្ដពន្លត់អគ្គិភ័យរបស់អធិការដ្ឋាននគរបាលស្រុកស្អាងចំនួន០១គ្រឿង, រថយន្ដពន្លត់អគ្គិភ័យរបស់អធិការដ្ឋាននគរបាលស្រុកកៀនស្វាយចំនួន០១គ្រឿងនិងរថយន្ដពន្លត់អគ្គិភ័យរបស់អធិការដ្ឋាននគរបាលស្រុកកោះធំចំនួន០១គ្រឿង រួមទាំងបងប្អូនប្រជាពលរដ្ឋជាច្រើននាក់ទៀត រហូតភ្លើងរលត់ជាស្ថាពរនៅវេលាម៉ោង១០និង១០នាទី ប្រើរយៈពេលមួយម៉ោង។
យោងតាមការសន្និដ្ឋានបឋមរបស់សមត្ថកិច្ចជំនាញបានឱ្យដឹងថា ករណីនេះ បណ្តាលមកពីទុស្សេខ្សែភ្លើង៕
ដោយ៖ ស្អាងជ័យ
