សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រុសស្រី២នាក់រួមដំណេីរជាមួយគ្នាដោយរថយន្តមួយគ្រឿងម៉ាក Ford Ranger ទៅបុកម៉ូតូម៉ាកហុងដាឌ្រីមស៊េរីឆ្នាំ២០២១ បណ្ដាលឲ្យបុរសម្នាក់រងរបួសធ្ងន់ កាលពីវេលាម៉ោង១០ និង៥០នាទីយប់ ថ្ងៃទី២៩ ខែវិច្ឆិកា ឆ្នាំ២០២១ ត្រង់ចំណុចច្រមុះជ្រូកក្បាលថ្នល់ តាមបណ្ដោយផ្លូវ២៧១ កែងផ្លូវព្រះមុន្នីវង្ស ក្នុងសង្កាត់ផ្សារដេីមថ្កូវ ខណ្ឌចំការមន ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុនោះ គេឃេីញបុរសម្នាក់ជិះម៉ូតូម៉ាក ហុងដាឌ្រីម ស៊េរីឆ្នាំ២០២១ ពណ៌ខ្មៅ ពាក់ស្លាកលេខភ្នំពេញ 1IZ-3614 ធ្វេីដំណេីរតាមបណ្ដោយផ្លូវ៦០ម៉ែត្រ ទិសដៅពីត្បូងមកជេីង និងបានឆ្លងកាត់ផ្លូវ២៧១ពាក់កណ្ដាលផ្លូវ ក៏ត្រូវរថយន្តស៊េរីទំនេីបម៉ាក Ford Ranger ពណ៌ស ពាក់ស្លាកលេខភ្នំពេញ 2BD-0979 បេីកបរដោយបុរសម្នាក់ និងនារីម្នាក់រួមដំណេីរជាមួយ តាមបណ្ដោយផ្លូវ២៧១ ទិសដៅពីកេីតមកលិចក្នុងល្បឿនលឿនល្មម ហេីយបុកម៉ូតូជនរងគ្រោះពីចំហៀង បណ្ដាលឲ្យបុរសម្នាក់ម្ចាស់ម៉ូតូរងរបួសបាក់ជេីងម្ខាង ត្រូវបានបញ្ចូនទៅកាន់មន្ទីរពេទ្យភ្លាមៗ ។ ចំណែកភាគីរថយន្ត Ford Ranger បានចាកចេញពីកន្លែងកេីតហេតុបាត់ស្រមោល ។
ក្រោយកេីតហេតុ គេសង្កេតមិនឃេីញមានភាគីរថយន្ត និងភាគីម៉ូតូខាងលេីចុះមកសម្របសម្រួលគ្នានោះទេ ទេីបសមត្ថកិច្ចមូលដ្ឋានសម្រេចឲ្យផ្នែកជំនាញចរាចរណ៍ចុះមកធ្វេីការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
