សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ជិះម៉ូតូ២គ្រឿងធ្វេីសកម្មភាពឆក់យកទូរស័ព្ទដៃពីនារី២នាក់បានសម្រេចហើយ តែត្រូវបុរសអ្នកបើកឡំប្រឺតាដេញបុកបណ្តាលឱ្យដួលម៉ូតូជនសង្ស័យុមួយគ្រឿង រួចជនសង្ស័យក៏បន្តរត់គេចខ្លួន ប៉ុន្តែត្រូវយុវជនម្នាក់ដេញដណ្តើមយកទូរស័ព្ទបានមកវិញ។
ហេតុការណ៍នេះបង្កការភ្ញាក់ផ្អេីលកាលពីវេលាម៉ោង១១យប់ ថ្ងៃទី៨ ខែធ្នូ ឆ្នាំ២០២១ នៅចំណុចលេីស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនពេលកេីតហេតុគេឃេីញនារី២នាក់ជិះម៉ូតូមួយគ្រឿងម៉ាកស្គូពី ស៊េរីឆ្នាំ២០២១ ពាក់ស្លាកលេខភ្នំពេញ1JB-3637ធ្វេីដំណេីរតាមបណ្តោយផ្លូវលេខ២៧១ ឡេីងស្ពានអាកាសស្ទឹងមានជ័យក្នុងទិសដៅពីត្បូងទៅជេីង ខណៈមកដល់ពាក់កណ្តាលស្ពានស្រាប់តែមានជនសង្ស័យចំនួន២នាក់ជិះម៉ូតូ២គ្រឿងដោយមួយគ្រឿងម៉ាកស្គូពី ស៊េរីឆ្នាំ២០១៥ ពាក់ស្លាកលេខភ្នំពេញ1BV-4364 និងមួយគ្រឿងទៀតមិនចាំម៉ាក បានជិះបញ្ច្រាសទិសដៅចរាចរណ៍ឡេីងលេីស្ពានអាកាសហេីយបានធ្វេីសកម្មភាពឆក់យកទូរស័ព្ទដៃរបស់នារីរងគ្រោះដែលអង្គុយខាងក្រោយបានសម្រេច រួចហេីយបានព្យាយាមជិះម៉ូតូគេចខ្លួន ប៉ុន្តែភ្លាមៗនោះស្រាប់តែមានបុរសម្នាក់បេីកឡំប្រឺតាមកពីក្រោយនារីរងគ្រោះឃេីញដូចនេះក៏បេីកឡំប្រឺតាបំបុកបណ្តាលឱ្យម៉ូតូជនសង្ស័យដួលតែម្តង។
ប្រភពដដែលបានបន្តថា បន្ទាប់មកជនសង្ស័យបានព្យាយាមរត់គេចខ្លួនទៀតដោយទុកម៉ូតូមួយគ្រឿងនិងដំបងឆក់មួយដេីមទៀត ហេីយយកទូរស័ព្ទដៃរបស់ជនរងគ្រោះទៅជាមួយ តែភ្លាមៗនោះក៏មានយុវជនម្នាក់ទៀតជិះម៉ូតូដឹកអីវ៉ាន់អនឡាញឃេីញក៏ជិះម៉ូតូដេញតាមក្រោយជនសង្ស័យរហូតទៅដល់ក្រោមស្ពានទេីបជនសង្ស័យគប់ទូរស័ព្ទជនរងគ្រោះទៅលេីយុវជនដឹកអីវ៉ាន់អនឡាញហេីយបន្តរត់ចូលកន្លែងស្ងាត់បាត់ទៅ។
ក្រោយកេីតហេតុយុវជនដឹកអីវ៉ាន់អនឡាញក៏បានប្រគល់ទូរស័ព្ទឱ្យទៅនារីរងគ្រោះវិញ ហេីយត្រូវបានសមត្ថកិច្ចនាំនារីរងគ្រោះទៅដាក់ពាក្យបណ្តឹងនិងយកម៉ូតូជនសង្ស័យទៅរក្សាទុករង់ចាំស្រាវជ្រាវតាមចាប់ជនសង្ស័យខាងលេីយកមកដាក់ទោសតាមច្បាប់៕
ដោយ៖សុខាសែនជ័យ
