សារព័ត៌មាន នគរវត្ត តែងតែនាំមុខគេជានិច្ច
ប្រធានក្រុមតោខៀវ Chelsea កីឡាករ Cesar Azpilicueta បានអំពាវនាវឱ្យក្រុមដោះស្រាយបញ្ហាខ្សែការពារ បន្ទាប់ពីក្រុមត្រូវបានបញ្ចប់ក្នុងលទ្ធផលស្មើ ៣-៣ ដោយក្រុម Zenit St Petersburg ក្នុងក្របខ័ណ្ឌ Champions League កាលពីថ្ងៃពុធ។
ពេលនេះក្រុម Chelsea បានរបូតគ្រាប់បាល់៣គ្រាប់ក្នុងការប្រកួតជាប់ៗគ្នា បន្ទាប់ពីចាញ់ក្រុម West Ham United ៣-២ ក្នុង Premier League កាលពីចុងសប្តាហ៍មុន។
កីឡាករ Azpilicueta វ័យ៣២ឆ្នាំបាននិយាយថា “ជាធម្មតាយើងជាក្រុមដែលរឹងមាំ យើងមិនរបូតឱកាសច្រើន ឬស៊ុតបញ្ចូលទីច្រើនទេ ប៉ុន្តែក្នុង២ប្រកួតចុងក្រោយនេះ ពួកយើងបានរបូតគ្រាប់បាល់ចំនួន៦គ្រាប់ ហើយវាមិនល្អគ្រប់គ្រាន់នោះទេ។ យើងត្រូវដោះស្រាយបញ្ហានេះចេញ”។
Chelsea ត្រូវបានក្រុម Zenit នាំមុខ បន្ទាប់ពីការចាប់ផ្តើមដ៏ល្អ និងតាមពីក្រោយ ២-១ នៅតង់ទីមួយ ហើយ Azpilicueta បាននិយាយថា “វាអាចកាន់តែអាក្រក់។ នៅក្នុងតង់ទី១យើងលេងបានល្អណាស់១៥នាទី ប៉ុន្តែបន្ទាប់មកយើងបានទម្លាក់កម្រិតរបស់យើង ហើយយើងអាចសូម្បីតែធ្លាក់ចុះ ៣-១ មុនពេលពាក់កណ្តាលតង់។ មានប៉ុន្មាននាទីដែលយើងបាត់បង់ល្បឿននៃការប្រកួត”។ យើងមានប្រតិកម្មយ៉ាងល្អនៅក្នុងតង់ទីពីរ ហើយយើងកំពុងតែនាំមុខក្នុងរយៈពេល៣នាទីទៀត ដូច្នេះវាពិតជាឈឺចាប់ខ្លាំងណាស់ក្នុងការវាយបក”។
កីឡាកររូបនេះបានបន្ថែមថា “នៅក្នុងកីឡាបាល់ទាត់ អ្នកត្រូវតែទទួលយកវា វិភាគ និងកែលម្អ។ យើងត្រូវការអ្នកគ្រប់គ្នាដើម្បីទទួលបានភាគរយបន្ថែមដែលកាន់តែច្បាស់ជាបុគ្គល និងជាក្រុម។ យើងត្រូវតែស្ដារឡើងវិញនូវភាពរឹងមាំនេះនៅទូទាំងក្រុមទាំងមូល”។
សូមបញ្ជាក់ថា ក្រុមតោខៀវ Chelsea កំពុងឈរចំណាត់ថ្នាក់លេខ៣ ក្នុងក្របខ័ណ្ឌ Premier League ក្រោយពីចាញ់ក្រុម West Ham កាលពីសប្តាហ៍មុន។ ក្រុមតោខៀវនឹងត្រូវទទួលភ្ញៀវក្រុម Leeds នៅថ្ងៃសៅរ៍វេលាម៉ោង១០យប់ក្នុងការប្រកួតក្របខ័ណ្ឌ Premier League សប្តាហ៍ទី១៦ ៕
ដោយ៖ ភារៈ(រូបភាព ៖ channelnewsasia.com)
