សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមសេចក្តីរាយការណ៍បានឱ្យដឹងថា រោងចក្របោកគក់សម្លៀកបំពាក់មួយកន្លែងពេលកម្មករទម្លាក់អុសលើគំនរធ្យូងដោយមិនដឹងថាមានសល់រងើកភ្លើងនៅក្នុងហ្នឹងនោះស្រាប់តែឆេះសន្ធោសន្ធៅផ្អើលដល់សមត្ថកិច្ចហៅរថយន្តពន្លត់អគ្គិភ័យមកជួយបាញ់ពន្លត់ទាន់ពេលវេលា ។
ហេតុការណ៍នេះបង្កឱ្យមានការភ្ញាក់ផ្អើល កាលពីវេលាម៉ោង១០និង៥០នាទីយប់ ថ្ងៃទី១៩ ខែធ្នូ ឆ្នាំ២០២១ នៅភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ។
សេចក្តីរាយការណ៍ព័ត៌មានពីស្ត្រីកម្មការិនីរោងចក្របោកគក់សម្លៀកបំពាក់បានឱ្យដឹងថា រោងចក្របោកគក់សម្លៀកបំពាក់ខាងលើមានឡដុតអុសដើម្បីបោកគក់សម្លៀកបំពាក់នៅទីតាំងកន្លែងឆេះដោយមានពំនូកផេះធ្យូងដែលចាក់ទុកចោល ហើយមុនពេលកើតហេតុមានរថយន្តដឹកអុសរោងចក្រនេះបានយកអុសមកទម្លាក់នៅលើពំនូកផេះធ្យូងបង្កឱ្យឆាបឆេះជាអណ្តាតភ្លើងយ៉ាងសន្ធោសន្ធៅខ្ពស់ជាងដំបូលរោងចក្រទៅទៀត និងបណ្តាលឲ្យដាច់ខ្សែភ្លើងនៅខាងលើជាប់នឹងដំបូលរោងចក្រផងដែរ តែមិនបង្កឱ្យឆាបឆេះរាលដាលដល់រោងចក្រនិងផ្ទះប្រជាពលរដ្ឋនោះទេ ។
ប្រភពព័ត៌មានពីកន្លែងកើតហេតុបានបន្តទៀតថា ខណៈពេលឆេះនោះភ្លាមៗបងប្អូនប្រជាពលរដ្ឋបានទូរស័ព្ទប្តឹងសមត្ថកិច្ច និងហៅរថយន្តពន្លត់អគ្គិភ័យមកជួយបាញ់ទឹកពន្លត់។ បន្ទាប់មករថយន្តពន្លត់អគ្គិភ័យរបស់ស្នងការដ្ឋានរាជធានីភ្នំពេញបានមកដល់ចំនួន៣គ្រឿង តែបាញ់ទឹកអស់ចំនួន២គ្រឿងបានរលត់ទៅវិញ ។
ប្រជាពលរដ្ឋបានឱ្យដឹងថា ករណីខាងលើនេះប្រសិនបើគ្មានការអន្តរាគមន៍ទាន់ពេលវេលានោះទេរោងចក្របោកគក់នេះច្បាស់ក្លាយជាផេះបាត់ទៅហើយ៕
ដោយ៖អរុណរះ
