សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ទីតាំងសង្វៀនបញ្ជល់មាន់មួយកន្លែង ត្រូវបានកងរាជអាវុធហត្ថស្រុកព្រៃនប់បង្ក្រាបនិងឃាត់ខ្លួនមនុស្សចំនួន១៨នាក់ រួមទាំងវត្ថុតាងជាក់ស្ដែងមួយចំនួនផង។
បេីយោងតាមប្រភពព័ត៌មានពីមន្រ្តីកងរាជអាវុធហត្ថស្រុកព្រៃនប់បានឱ្យដឹងថា ដោយមានបទបញ្ជាយ៉ាងមុឺងម៉ាត់ពីលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ នៅវេលាម៉ោង១៤និង០០នាទី ថ្ងៃទី២៥ ខែធ្នូ ឆ្នាំ២០២១ កម្លាំងជំនាញ ដឹកនាំដោយលោកអនុសេនីយ៍ឯក ម៉ែន វណ្ណា សហការជាមួយកម្លាំងការិយាល័យបទល្មើសព្រហ្មទណ្ឌខេត្តព្រះសីហនុ ដឹកនាំដោយលោកវរសេនីយ៍ត្រី សេក សូនី នាយការិយាល័យបទល្មើសព្រហ្មទណ្ឌ និងរួមជាមួយកម្លាំងកងរាជអាវុធហត្ថស្រុកស្ទឹងហាវ បានចុះបង្ក្រាបទីតាំងសង្វៀនល្បែងភ្នាល់បញ្ជល់មាន់ជាក់ស្តែង។
ប្រភពដដែលបន្តថា ក្នុងប្រតិបត្តិការខាងលេីនេះកម្លាំងជំនាញបានឃាត់ខ្លួនមនុស្សចំនួន១៨នាក់ និងដកហូតវត្ថុតាងរួមមាន៖
ម៉ូតូចំនួន៣៩គ្រឿង, រថយន្តចំនួន ០២គ្រឿង, មាន់ជល់មួយចំនួន, ជញ្ជីងថ្លឹងមាន់០១និងសម្ភារសម្រាប់បញ្ជល់មាន់មួយចំនួន។
បច្ចុប្បន្ន ជនសង្ស័យខាងលើត្រូវបានបញ្ជូនទៅកាន់ការិយាល័យបទល្មើសព្រហ្មទណ្ឌខេត្ត រីឯវត្ថុតាងត្រូវបានរក្សាទុកនៅមូលដ្ឋានកងរាជអាវុធហត្ថស្រុកព្រៃនប់៕
ដោយ៖សហការី
