សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តស៊េរីទំនើបម៉ាកFORD RAPTORមួយគ្រឿងជ្រុលទៅបុកក្បាលថ្មពុះចែកទ្រូងផ្លូវបណ្តាលឱ្យក្រឡាប់ផ្ងារជេីងរងការខូចខាតយ៉ាងដំណំ ធ្វេីឲ្យមានការភ្ញាក់ផ្អេីលកាលពីវេលាម៉ោង១០ និង១០នាទីយប់ថ្ងៃទី៥ ខែមករា ឆ្នាំ២០២២ នៅចំណុចមុខវិទ្យាល័យ ជា ស៊ីម សាមគ្គី តាមបណ្ដោយផ្លូវលេខ២៧១ ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញបុរសម្នាក់បើករថយន្តស៊េរីទំនើបម៉ាកFORD RAPTOR ពណ៌ខ្មៅ ពាក់ស្លាកលេខ កម្ពុជាB-CH-007 ធ្វើដំណើរតាមបណ្ដោយផ្លូវលេខ២៧១ពីត្បូងទៅជើងក្នុងល្បឿនលឿន។ លុះបើកមកដល់ចំណុចកើតហេតុខាងលើគាប់ជួនផ្លូវកោងបន្តិចផង ហើយប្រហែលជាបួងចង្កូតមិនទាន់ផង ក៏ជ្រុលទៅបុកក្បាលថ្មពុះចែកទ្រូងផ្លូវពេញទំហឹង បណ្ដាលឱ្យបាក់អស់មួយកង់ ។ ចំណែករថយន្តក្រឡាប់ផ្ងារជើងមួយចំហៀង រងការខូចខាតយ៉ាងដំណំ។ ភ្លាមៗនោះប្រជាពលរដ្ឋនៅក្បែរកន្លែងកើតហេតុបាននាំគ្នាជួយលើករថយន្តឱ្យឈរត្រង់មកវិញ ហើយសំណាងដែរដែលអ្នកបើកបរមិនមានរងរបួស និងមិនបង្កគ្រោះថ្នាក់ដល់អ្នកដទៃ។
ក្រោយកេីតហេតុ គេឃើញមានរថយន្តមួយគ្រឿងបានមកដល់ហើយនាំអ្នកបើកបររថយន្តបង្កហេតុឡេីងជិះចេញពីកន្លែងកើតហេតុបាត់ទៅ ដោយបន្សល់ទុករថយន្តបង្កឱ្យសមត្ថកិច្ចមូលដ្ឋាន និងផ្នែកជំនាញចរាចរណ៍ចុះមកធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមក្រោយ៕
ដោយ ៖ ភារ៉ា ដង្កោ
