សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Alexis Sanchez របស់ក្លិប Inter Milan បានស៊ុតបញ្ចូលទីនៅនាទីចុងក្រោយនៃម៉ោងបន្ថែម ដើម្បីដណ្តើមបានជ័យជម្នះ ២-១ លើក្រុម Juventus ក្នុងការប្រកួតពានរង្វាន់ Italian Super Cup នៅកីឡដ្ឋាន San Siro កាលពីរាត្រីថ្ងៃពុធ ដែលជាការកត់សម្គាល់ជ័យជម្នះលើកដំបូងរបស់ក្លិប Inter Milan ក្នុងការប្រកួតអស់រយៈពេល១១ឆ្នាំ។
ហ្វូងមនុស្សដែលចូលទស្សនាផ្ទាល់ក្នុងកីឡដ្ឋានត្រូវបានកាត់បន្ថយសមត្ថភាពមកត្រឹម៥០ភាគរយដោយសារតែការរឹតត្បិត COVID-19 បានផ្ទុះឡើងដោយក្ដីរីករាយនៅពេលដែលកីឡាករបម្រុងសញ្ជាតិឈីលីAlexis Sanchez រកបាន១គ្រាប់ពីការស៊ុតបញ្ចូលទីក្នុងនាទីទី១២០ និងសម្រេចការប្រកួត ‘Derby of Italy’ រវាងគូប្រជែងជាប្រវត្តិសាស្ត្រទាំង២ក្រុមនេះ។
ខ្សែប្រយុទ្ធ Sanchez បាននិយាយបន្ទាប់ពីចាប់ផ្តើមការប្រកួតថា “កាន់តែជើងឯកលេងកាន់តែច្រើន ហើយធ្វើអ្វីដែលគ្មាននរណាម្នាក់អាចធ្វើបាន។ថ្ងៃនេះវាបែបហ្នឹង ខ្ញុំគិតថាខ្ញុំនឹងចាប់ផ្តើមព្រោះខ្ញុំមានទម្រង់លេង ខ្ញុំគោរពគ្រូបង្វឹក ប៉ុន្តែខ្ញុំស្រេកឃ្លានដើម្បីឈ្នះ ខ្ញុំមានអារម្មណ៍ដូចជាសត្វតោជាប់ទ្រុង”។
កីឡាករ Weston McKennie របស់ក្រុម Juventus បានរកគ្រាប់បាល់នាំមុខនៅនាទីទី២៥ ប៉ុន្តែកីឡាករ Lautaro Martinez តាមស្មើវិញពីការស៊ុតបាល់ប៉េណាល់ទីក្នុងតង់ទី១ នាទីទី៣៥ ហើយលទ្ធផលស្មើនេះបានបន្តរហូតដល់ចប់ការប្រកួត។
ក្រុម Inter Milan បានគ្រប់គ្រងបាល់ និងការព្យាយាមរកគ្រាប់បាល់ ប៉ុន្តែត្រូវបានអ្នកចាំទី និងខ្សែការពារក្រុម Juventus រារាំង និងសង្គ្រោះបានជាច្រើនដង។ ចូលដល់ការប្រកួតក្នុងម៉ោងបន្ថែម១៥នាទី២ដង ខ្សែប្រយុទ្ធSanchez បានរកគ្រាប់បាល់១គ្រាប់ឲ្យ Inter Milan ដែលជាគ្រាប់បាល់ជ័យក្នុងពានរង្វាន់ Super Cup ជាលើកទី៦របស់ពួកគេ និងជាលើកដំបូងរបស់ពួកគេចាប់តាំងពីឆ្នាំ២០១០មក។
ពានរង្វាន់នេះដែលត្រូវបានប្រគល់ជូនជារៀងរាល់ឆ្នាំក្រុមដែលត្រូវប្រកួតគឺក្រុមជាម្ចាស់ម្ចាស់ជើងឯក Serie A និងក្រុមជាម្ចាស់ជើងឯក Italian Cup បានផ្តល់ឱកាសសម្រាប់គ្រូបង្វឹកទាំង២ក្នុងការបង្កើតកំណត់ត្រារបស់ពួកគេ។
លោក Simone Inzaghi កំពុងស្វែងរកជ័យជម្នះដំបូងរបស់គាត់ក្នុងនាមជាគ្រូបង្វឹករបស់ Inter Milan ខណៈដែលលោក Massimiliano Allegriគ្រូបង្វឹក Juventus បានកំណត់គោលដៅនៃពានរង្វាន់ទី១ នៃការខកចិត្តលើកទី២ ដែលក្រុមនេះស្ថិតនៅលេខ៥ ក្នុងក្របខ័ណ្ឌ Serie A ដែលមាន១១ពិន្ទុតាមពីក្រោយក្រុមកំពូលតារាង Inter Milan។
ក្រុម Inter Milan ដែលបានទទួលជ័យជម្នះ៨លើកជាប់ៗគ្នា ហើយក្រុមនេះកំពុងតែដាក់គោលដៅក្នុងការប្រជែងពានរង្វាន់ Serie A នៅរដូវកាលនេះ និងកំពុងតែស្ថិតក្នុងការប្រជែងក្នុងការប្រកួត Champions League ក្នុងវគ្គ១៦ក្រុមចុងក្រោយផងដែរ ៕
ដោយ៖ ភារៈ(រូបភាព ៖ CNA)
