សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានឱ្យដឹងថា ដើម្បីយុទ្ធនាការការពារនូវសុខុមាលភាពជូនប្រជាពលរដ្ឋ ទប់ស្កាត់អំពើមិនសុចរិត ការពារប្រយោជន៍អ្នកប្រើប្រាស់ រក្សារសមធម៌ក្នុងទីផ្សារ និងអនុវត្តច្បាប់របស់មន្រ្តីជំនាញ ក.ប.ប.។
មន្រ្តីជំនាញ ក.ប.ប. សាខារាជធានីភ្នំពេញ ខេត្តបាត់ដំបង ខេត្តព្រះសីហនុ និងខេត្តកោះកុង រួមជាមួយនឹងរថយន្តចល័តផ្នែកម្ហូបអាហារផងដែរនោះ នាថ្ងៃទី៧ ខែមីនា ឆ្នាំ២០២២ បានចុះត្រួតពិនិត្យនូវទំនិញដែលជាគ្រឿងឧបភោគ បរិភោគប្រើប្រាស់គ្រប់ប្រភេទនៅលើទីផ្សារ ឃ្លាំងស្តុក លក់ និងចែកចាយផ្សេងៗគ្នាស្ថិតនៅតាមគោលដៅអតិភាពមួយចំនួន។ គោលបំណងគឺដើម្បីស្វែករកភាពមិនអនុលោមនៃទំនិញទាំងអស់នោះដែលចរាចរដោយធុរជន តាំងចេតនា និងអចេតនា ធ្វើឱ្យប៉ះពាល់ដល់សុខភាពប្រជាពលរដ្ឋដែលជាអ្នកប្រើប្រាស់ចុងក្រោយ និងខាតបង់ផលប្រយោជន៍ផ្សេងៗ។
តាមលទ្ធផលមន្រ្តីជំនាញបានរកឃើញ និងដកហូតបានទំនិញមិនមានអនុលោមភាពចំនួន ៨២.៥គីឡូក្រាមយកមកកម្ទេចចោល និងពិន័យទៅលើម្ចាស់ទំនិញទៅតាមនីតិវិធី។
ដោយឡែកនៅថ្ងៃដដែលនោះ មន្រ្តីជំនាញ ក.ប.ប. សាខារាជធានីភ្នំពេញ ខេត្តកំពត ខេត្តសៀមរាប និងខេត្តកំពង់ធំបន្តប្រតិបត្តិការត្រួតពិនិត្យប្រេងឥន្ធនៈនៅតាមបណ្ដាស្ថានីយ និងដេប៉ូចំនួន ២២ទីតាំង។ គោលបំណងនៃការត្រួតពិនិត្យគឺដើម្បីបន្តស្វែងរកភាពមិនអុលោមភាពលើវិស័យប្រេងឥន្ធនៈ និងរារាំងអំពើមិនសុចរិតផ្សេងៗទៅលើអ្នកប្រើប្រាស់ ក៏ដូចជាក្នុងធុរកិច្ចពាណិជ្ជកម្ម។
ជាក់ស្ដែងជាលទ្ធផលនៃការត្រួតពិនិត្យគឺមានតែ ២ទីតាំងប៉ុណ្ណោះដែលមិនមានអនុលោមភាព ជាលទ្ធផលមួយប្រសើរ និងពិន័យលើម្ចាស់ដេប៉ូទាំង ២នោះផងដែរ៕
ដោយ៖សហការី
