សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ធ្វើឲ្យអ្នកគាំទ្រមានការនឹកឆ្ងល់មិនតិចនោះទេក្រោយពីបាត់មុខម្ចាស់មកុដ Miss Wisdom Cambodia 2021 កញ្ញា ហុក សារិតុលា មិនមានសកម្មភាពសិល្បៈណាមួយជាដុំកំភួនគគ្រឹកគគ្រេងដូចបណ្តាកញ្ញាឯកដទៃនោះ។ ខណៈដែលអ្នកគាំទ្រជាច្រើនបានដាក់ក្តីរំពឹងខ្ពស់ថានាងអាចនឹងក្តោបបានឱកាសការងារសិល្បៈយ៉ាងណែនក្នុងដៃក្រោយពេលក្លាយជាម្ចាស់មកុដ ព្រោះតែនាងមានទាំងព្រមពិសេសទុនសម្រាប់ប្រឡូកក្នុងអាជីពសិល្បៈទាំងរូបសម្រស់ស្រស់សោភា សមត្ថភាព ទេពកោលស្យចំណេះដឹង និងអត្តចរិកបុគ្គលិកលក្ខណៈជាដើម។
ទោះជាយ៉ាងណាកាលពីថ្មីៗនេះ គេបានឃើញនាងបង្ហាញវត្តមានក្នុងកម្មវិធីប្រកួតសម្រស់Mister Supranational Cambodia ដោយនាងបានទាំងធ្វើការ Live វីដេអូជជែកលេងជាមួយអ្នកគាំទ្រផងដែរ ប៉ុន្តែនាងមិនបានបង្ហើបអំពីគម្រោងនៃការចេញទៅប្រកួតក្រៅប្រទេស ឬការងារសិល្បៈណាមួយទៅកាន់អ្នកគាំទ្រ ឡើយ ខណៈដែលអ្នកគាំទ្រទន្ទឹងរងចាំដំណឹងនៃការចេញទៅប្រគួតនៅក្រៅប្រទេស។
គួរបញ្ជាក់ដែរថា មុននេះកញ្ញា ហុក សារិតុលា នឹងក្លាយជាបេក្ខភាពប្រកបដោយសក្តានុពលថ្មីសម្រាប់កម្ពុជាបន្ទាប់ពីកម្ពុជាបានត្រៀមបញ្ចេញបេក្ខភាពកញ្ញាឯកមួយចំនួនចេញទៅប្រកួតនៅលើឆាកអន្តរជាតិ។ កញ្ញាឯកមកពីខេត្តបាត់ដំបងបានក្លាយជាម្ចាស់មកុដពីកម្មវិធីMiss Wisdom Cambodia ២០២១ ដែលត្រូវបានរៀបចំជាលើកដំបូងនៅកម្ពុជាកាលពីអំឡុងចុងខែសីហាឆ្នាំ ២០២១។ កញ្ញា ហុក សារិតុលា មានអាយុ១៩ឆ្នាំ កម្ពស់១,៧០ម៉ែត្រ ទម្ងន់៤៩គីឡូក្រាម ទំហំទាំង៣គឺ៣៤,២៤,៣៥។ នាងទទួលបានការកោតសរសើរថា ពិតជាស័ក្តិសមទៅនឹងតំណែងមួយនេះ ខណៈទាំងរូបសម្រស់ និងសមត្ថភាពក្នុងការដើរ និងឆ្លើយសំណួរត្រូវបាននាងធ្វើបានយ៉ាងល្អជាមួយនឹងភាពក្លាហាន និងទំនុកចិត្តខ្ពស់មិននឹកស្មានដល់។ កម្មវិធីប្រកួតសម្រស់Miss Wisdom World គ្រោង ធ្វើឡើងនៅទីក្រុងហូជីមិញ ប្រទេសវៀតណាមចាប់ពីថ្ងៃទី១៦ ដល់ថ្ងៃទី២៧ ខែវិច្ឆិកា ឆ្នាំ២០២១ជាមួយបេក្ខភាពមកពីបណ្តាប្រទេសប្រមាណ៩០។ ប៉ុន្តែគម្រោងនៃការប្រកួតត្រូវបានប្រកាសពន្យារពេលព្រោះតែការរីករាលដាលនៃជំងឺកូវីដ-១៩ រហូតដល់បច្ចុប្បន្ន៕
ដោយ ៖ វឌ្ឍនា
