សារព័ត៌មាន នគរវត្ត តែងតែនាំមុខគេជានិច្ច
ខ្សែបម្រើ Paul Pogba របស់ក្រុមបិសាចក្រហម Manchester United បាននិយាយថា ក្រុមចោរបានលួចយកមេដាយម្ចាស់ជើងឯក World Cup របស់គាត់នៅពេលដែលក្រុមចោរបានលួចចូលផ្ទះរបស់គាត់។ កីឡាករអន្តរជាតិបារាំងវ័យ២៩ឆ្នាំបាននិយាយអំពី “សុបិន្តអាក្រក់បំផុតរបស់គ្រួសារ” កាលពីសប្តាហ៍មុននៅពេលដែលផ្ទះរបស់គាត់ត្រូវបានចោរចូលកំឡុងពេល គាត់ប្រកួតជាមួយក្រុម Atletico Madrid ក្នុងក្របខ័ណ្ឌ Champions League ។
កូនតូចពីរនាក់របស់គាត់ និងមេដោះរបស់ពួកគេនៅក្នុងផ្ទះនៅពេលនោះ។គាត់បានបន្តថា “រឿងសំខាន់គឺថាកូនរបស់ខ្ញុំមានសុវត្ថិភាពល្អ ។ មានគ្រឿងអលង្ការពីម្តាយខ្ញុំ មេដាយជើងឯកពិភពលោករបស់ខ្ញុំ ហើយអ្វីដែលខ្ញុំខ្លាចបំផុតនោះគឺកូន២នាក់របស់ខ្ញុំនៅផ្ទះជាមួយមេដោះក្នុងហេតុការណ៍នេះ។ នាងបានឮអ្វីៗគ្រប់យ៉ាង ទូរស័ព្ទទៅប្រពន្ធខ្ញុំ និងសន្តិសុខ បន្ទាប់មកបានចាក់សោជាមួយប្រុសៗនៅក្នុងបន្ទប់”។
កីឡាកររូបនេះបានបន្ថែមថា “ការសម្រាកនេះផ្តល់ឱ្យខ្ញុំនូវខ្យល់បរិសុទ្ធពិតប្រាកដ។ ខ្ញុំចង់មានពេលលេងដើម្បីត្រឡប់មកទម្រង់លេងកំពូលនៅក្លិប ការពាក់អាវនេះតំណាងឱ្យប្រទេសរបស់ខ្ញុំ គឺជាប្រភពនៃមោទនភាពជាងពេលណាៗទាំងអស់”។
Pogba បាននៅលេងនៅក្លិប Man Utd ចាប់តាំងពីបានចូលរួមជាមួយនេះក្លិបម្តងទៀតនៅក្នុងការផ្ទេរកំណត់ត្រាពិភពលោក៨៩លានផោនពី Juventus ក្នុងឆ្នាំ២០១៦ ដែលកិច្ចសន្យារបស់គាត់នឹងផុតកំណត់នៅរដូវក្តៅ។ បច្ចុប្បន្ន Pogba កំពុងនៅឆ្ងាយជាមួយប្រទេសបារាំង មុនពេលប្រកួតមិត្តភាពជាមួយក្រុមជម្រើសជាតិកូឌឺវ័រ និងអាហ្វ្រិកខាងត្បូង។
គួររំលឹកថា ក្រុមជម្រើសជាតិបារាំងបានឈ្នះពានរង្វាន់ World Cup ឆ្នាំ២០១៨ ដោយបានយកឈ្នះក្រុមក្រូអាតក្នុងលទ្ធផល ៤-២ នៅវគ្គផ្តាច់ព្រ័ត្រក្នុងទីក្រុង Moscow ហើយក្នុងព្រឹត្តិការណ៍នោះខ្សែបម្រើPogba ស៊ុតបញ្ចូលទីគ្រាប់ទី៣ឲ្យក្រុមបារាំង ៕
ដោយ៖ ភារៈ(រូបភាព ៖ BBC Sport)
