សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ ក្មេងប្រុសស្រី២នាក់ចុះលេងទឹកមិនប្រយ័ត្នធ្វើឱ្យរអិលជើងធ្លាក់ចូលទឹកជ្រៅលង់ស្លាប់ទាំង២ ។ ហេតុដែលបណ្តាលឱ្យលង់ស្លាប់ទាំងពីរនាក់នោះ គឺដោយសារតែពេលឃើញម្នាក់លង់ទឹកហើយម្នាក់ទៀតក៏ចុះទៅជួយទើបបណ្តាលឱ្យលង់ស្លាប់ទាំងពីរនាក់តែម្តង។ ហេតុការណ៍នេះបានកើតឡើងកាលពីថ្ងៃអាទិត្យ១០កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៧ ខែមីនា ឆ្នាំ២០២២ វេលាម៉ោង១៧:៣០នាទី ស្ថិតនៅចំណុចព្រែកទេរ ភូមិព្រែកកូវ ឃុំបុសលាវ ស្រុកចិត្របុរី ខេត្តក្រចេះ។ នេះបើយោងតាមរបាយការណ៍របស់សមត្ថ
កិច្ចនគរបាលរដ្ឋបាលប៉ុស្តិ៍បុសលាវដែលបានបញ្ជាក់ថា: មានករណីមនុស្សលង់ទឹកស្លាប់ចំនួន០២នាក់នៅចំណុចខាងលើ។ ជនរងគ្រោះទាំងពីរនាក់នោះមាន១-ឈ្មោះយោ សុខណី ភេទស្រី អាយុ១៦ឆ្នាំ ជនជាតិខ្មែរ មានស្រុកកំណើតនៅភូមិ១០៤ ឃុំថ្មី ស្រុកចិត្របុរី ខេត្តក្រចេះ បច្ចុប្បន្នស្នាក់នៅភូមិព្រែកកូវ ឃុំបុសលាវ ស្រុកចិត្របុរី ខេត្តក្រចេះ។ ២-ជនរងគ្រោះឈ្មោះរិន ណាសួន ភេទប្រុស អាយុ១០ឆ្នាំ ជនជាតិខ្មែរ រស់នៅភូមិព្រែកកូវ ឃុំបុសលាវ ស្រុកចិត្របុរី ខេត្តក្រចេះ។
សមត្ថកិច្ចបន្តថា ក្រោយការសាកសួរពត៌មានពីក្មេងស្រីរិន រក្សាដែលបានទៅលេងទឹកដែរនោះបានឱ្យដឹងថា ពេលឃើញឈ្មោះរិន ណាសួន ចុះលេងទឹកហើយរអិលជើងធ្លាក់ចូលអន្លង់ទឹកជ្រៅធ្វើឱ្យលង់នោះ ជនរងគ្រោះឈ្មោះយោ សុខណី បានចុះទៅជួយស្រង់ឈ្មោះរិន ណាសួន ក៏រអិលជើងធ្លាក់ចូលទឹកជ្រៅលង់ស្លាប់ទាំង២នាក់តែម្ដង។
ក្រោយមន្ត្រីជំនាញនិងនគបាលប៉ុស្តិ៍នគរបាលរដ្ឋបាលបុសលាវចុះទៅពិនិត្យនិងធ្វើកោសល្យវិច័យរួចរាល់ហើយបាន សន្និដ្ឋានថា: កុមារានិងកុមារីទាំងពីរ ពិតជាស្លាប់ដោយសារការលង់ទឹកពិតប្រាកដមែន ពុំមានស្លាកស្នាមណាមួយគួរឲ្យកត់សម្កាល់ឡើយ ហើយ(សព ទាំង០២)សមត្ថកិច្ចក៏បានប្រគល់ទៅឲ្យសាច់ញាតិ ធ្វើបុណ្យទៅតាមប្រពៃណីព្រះពុទ្ធសាសនា៕
ដោយ៖មាស សុផាត
