សារព័ត៌មាន នគរវត្ត តែងតែនាំមុខគេជានិច្ច
ខ្សែការពារស្លាប Marcelo ត្រូវបានគេរំពឹងថា នឹងនាំយករយៈពេល១៥ឆ្នាំកន្លះរបស់គាត់នៅ Real Madrid ឈានដល់ទីបញ្ចប់នៅរដូវក្តៅនេះ ដោយកិច្ចសន្យារបស់គាត់នឹងផុតកំណត់នៅថ្ងៃទី៣០ ខែមិថុនា ដូច្នេះហើយក្លិប បានចាប់ផ្តើមស្វែងរកកីឡាករដែលអាចដើរតួសំខាន់មកជំនួសសម្រាប់រដូវកាលក្រោយ។
ការមកដល់របស់ខ្សែការពារ Mendy ក្នុងឆ្នាំ២០១៩ឃើញថា Marcelo បានទទួលកៅអីបម្រុងរបស់ Real Madrid ។ យោងតាមការចេញផ្សាយរបស់សារព័ត៌មានអេស្ប៉ាញ MARCA មានកីឡាករចំនួន៣នាក់ដែលត្រូវបានជ្រើសរើសអាចចូលមកជំនួសតំណែងខ្សែការពារសញ្ជាតិប្រេស៊ីលជើងចាស់រូបនេះបាន។
១-កីឡាករMiguel Gutierrez
Miguel គឺជាកីឡាករដែលគួរឲ្យចាប់អារម្មណ៍ទាំងការពារ និងទាំងវាយបក ដោយសារគាត់មានទំនុកចិត្តក្នុងការការពារ។ នេះត្រូវបានបង្ហាញនៅក្នុងការបញ្ជូនបាល់ចំនួន៨ដងរបស់គាត់ និង២គ្រាប់សម្រាប់ការលេង។កីឡាករវ័យ២០ឆ្នាំរូបនេះនៅក្មេងគ្រប់គ្រាន់ដែលនៅទីបំផុតគាត់អាចស្នងតំណែង Mendy ជាជម្រើសដំបូងរបស់ក្លិប Real Madrid នៅខ្សែការពារឆ្វេង ហើយគាត់មានសក្តានុពលក្នុងការក្លាយជាកីឡាករល្អបំផុតម្នាក់នៅក្នុងតំណែងនេះនៅអឺរ៉ុប។
២-Fran Garcia
ដោយបានឆ្លងកាត់ការលេងនៅសាលាបាល់ទាត់ La Fabrica ដ៏ល្បីល្បាញរបស់ Real Madrid ខ្សែការពារឆ្វេងរបស់ក្រុម Rayo Vallecano គឺជាកីឡាករឆ្នើមម្នាក់នៅ La Liga ក្នុងរដូវកាលនេះ។កីឡាករវ័យ២២ឆ្នាំរូបនេះបានបង្ហាញខ្លួនសរុបចំនួន២៦លើកក្នុងក្របខ័ណ្ឌកំពូលរបស់ប្រទេសអេស្ប៉ាញសម្រាប់ក្រុម Rayo Vallecano។ គាត់មានបទពិសោធន៍ក្នុងក្រុមដំបូងច្រើនជាងខ្សែការពារស្លាបឆ្វេង និងជាខ្សែការពារដ៏រឹងមាំ។
៣-Angelino
ជាជម្រើសទី៣ និងចុងក្រោយ កីឡាករ Angelino របស់ក្រុម RB Leipzig ដែលអាចលេងនៅតំបន់ការពារឆ្វេង ប៉ុន្តែក៏ជាខ្សែការពារស្លាបឆ្វេង ឬជាខ្សែបម្រើស្លាបឆ្វេងផងដែរ។ កីឡាករវ័យ២៥ឆ្នាំគឺជាកីឡាករដែលមានបទពិសោធន៍ច្រើនក្នុងចំណោមជម្រើសទាំង៣ ដោយបានលេងជាទៀងទាត់នៅ Bundesliga និង Champions League ក្នុងរដូវកាលថ្មីៗនេះ ហើយគាត់មានចរិតស្រដៀងនឹង Marcelo ព្រោះគាត់ជាខ្សែការពារដែលមានស្មារតីវាយលុកខ្លាំង។ គុណសម្បត្តិដ៏ល្អមួយរបស់ Angelino គឺការបញ្ជូនបាល់របស់គាត់ឱ្យមិត្តរួមក្រុមចំនួន៥ដងនៅក្នុងក្របខ័ណ្ឌ Bundesliga និង៣ដង ក្នុងការបញ្ជូនបាល់ឱ្យមិត្តរួមក្រុមនៅក្របខ័ណ្ឌ Champions League ៕
ដោយ៖ ភារៈ(រូបភាព ៖ MARCA)
