សារព័ត៌មាន នគរវត្ត តែងតែនាំមុខគេជានិច្ច
ក្លិបបិសាចក្រហម Manchester United បានតែងតាំងគ្រូបង្វឹក Ajax លោក Erik ten Hag ជាគ្រូបង្វឹកបន្ទាប់របស់ក្លិបនេះដែលនឹងចូលដឹកនាំនៅរដូវកាលក្រោយ។ បុរសសញ្ជាតិហូឡង់វ័យ៥២ឆ្នាំរូបនេះនឹងចូលកាន់តំណែងជំនួសគ្រូបង្វឹកបណ្តោះអាសន្នលោក Ralf Rangnick នៅចុងបញ្ចប់នៃរដូវកាលនេះក្នុងកិច្ចសន្យារយៈពេល៣ឆ្នាំដែលអាចបន្តបានមួយឆ្នាំទៀត។
លោក Rangnick ដែលបានជំនួសតំណែងលោក Ole Gunnar Solskjaer ក្នុងខែវិច្ឆិកា គ្រោងនឹងផ្លាស់ទៅធ្វើជាទីប្រឹក្សា។ លោក Ten Hag នឹងក្លាយជាអ្នកចាត់ការអចិន្ត្រៃយ៍ទី៥របស់ United ចាប់តាំងពីលោក Sir Alex Ferguson ចូលនិវត្តន៍កាលពីឆ្នាំ២០១៣។
លោក Ten Hag បាននិយាយថា “វាជាកិត្តិយសដ៏អស្ចារ្យដែលត្រូវបានតែងតាំងជាអ្នកចាត់ការទូទៅរបស់ Manchester United ហើយខ្ញុំពិតជារំភើបយ៉ាងខ្លាំងចំពោះការប្រកួតប្រជែងនាពេលខាងមុខ។ ខ្ញុំដឹងពីប្រវត្តិនៃក្លិបដ៏អស្ចារ្យនេះ និងចំណង់ចំណូលចិត្តរបស់អ្នកគាំទ្រ ហើយខ្ញុំពិតជាប្ដេជ្ញាចិត្តក្នុងការអភិវឌ្ឍន៍ក្រុមដែលមានសមត្ថភាពផ្តល់នូវភាពជោគជ័យដែលពួកគេសមនឹងទទួលបាន”។
ក្រុម Man United ឈរនៅលេខរៀងទី៦ក្នុង Premier League ជាមួយនឹងការប្រកួតចំនួន៥ដែលនៅសល់ក្នុងរដូវកាលនេះ ដោយចាញ់៣ពិន្ទុតាមពីក្រោយក្រុម Tottenham ដែលកាន់កាប់តំណែងទី៤នៃក្របខ័ណ្ឌ Champions League។ ចំណែកក្រុម Ajax កំពុងឈរលើកំពូលតារាង Eredivisie របស់ហូឡង់ ដែលមានពិន្ទុដាច់ពីក្រុម PSV Eindhoven ចំនួន៤ពិន្ទុ ដោយនៅសល់ការប្រកួតចំនួន៥ទៀត បើទោះបីជាពួកគេបានចាញ់គូប្រជែងរបស់ពួកគេក្នុងវគ្គផ្តាច់ព្រ័ត្រនៃ Dutch Cup ក៏ដោយ។
លោក Ten Hag ដែលបានចូលកាន់តំណែងជាគ្រូបង្វឹករបស់ក្លិប Ajax តាំងពីខែធ្នូ ឆ្នាំ២០១៧ បានដឹកនាំពួកគេឡើងទៅកាន់លីក និង Cup ពីរដងក្នុងឆ្នាំ២០១៨-២០១៩ និង២០២០-២០២១។ ក្រុមនេះបានឈានដល់វគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ឆ្នាំ២០១៨-២០១៩។
លោក Ten Hag ត្រូវបានគេរំពឹងថា នឹងនាំយកអតីតគ្រូបង្វឹក ឬកីឡាកររបស់ United មកធ្វើជាផ្នែកនៃក្រុមរបស់គាត់ ព្រោះវាទំនងជាមិនមានទំនាក់ទំនងដែលនៅសេសសល់ទៅកាន់យុគសម័យលោក Solskjaerលោក Mike Phelan នឹងនៅជាមួយក្លិបនោះទេ។ លោក Ten Hag ចង់ឱ្យអតីតគ្រូបង្វឹកអង់គ្លេស និងអតីតជំនួយការរបស់លោក Ferguson លោក Steve McClaren ធ្វើការជាមួយគាត់។ លោក McClaren បានធ្វើការជាមួយលោក Ten Hag នៅ FC Twente ហើយគាត់អាចផ្តល់នូវការយល់ដឹងដែលមិនអាចកាត់ថ្លៃបានចំពោះការងាររបស់ United និងបាល់ទាត់អង់គ្លេសជាទូទៅ។
គួររំលឹកថា ក្លិបបិសាចក្រហម Manchester United បានឈ្នះពានរង្វាន់ចំនួន៣៨កំឡុងរជ្ជកាលរបស់លោក Ferguson រយៈពេល២៦ឆ្នាំនៅ Old Trafford រួមទាំងពានរង្វាន់លីកចំនួន១៣, ពានរង្វាន់ Champions Leagues ចំនួន២, FA Cup ចំនួន៥ និង League Cup ចំនួន៤។ ចាប់តាំងពីការចាកចេញរបស់គាត់ ក្លិបបានឈ្នះតែពានរង្វាន់ FA Cup ក្រោមការដឹកនាំរបស់ Louis van Gaal, League Cup, Europa League និង Community Shield ក្រោមការដឹកនាំរបស់លោក Jose Mourinho និង Charity Shield ក្រោមការដឹកនាំរបស់លោក David Moyes៕
ដោយ៖ ភារៈ(រូបភាព ៖ BBC Sport)
