សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ ដោយសារតែបាតុភូតគ្រោះធម្មជាតិ បណ្ដាលឱ្យមនុស្សម្នាក់ស្លាប់ និង២នាក់រងរបួស ខណៈពួកគាត់ត្រូវរន្ទះបាញ់ចំកាលពីរសៀលថ្ងៃទី២៨ ខែមេសា ឆ្នាំ២០២២នេះ ស្ថិតនៅភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប។
ជាក់ស្ដែងយោងតាមរបាយការណ៍របស់នគរបាលស្រុកស្វាយលើ ខេត្តសៀមរាប បានឱ្យដឹងថា ករណីរន្ទះបាញ់ខាងលើនេះ គឺបណ្តាលឱ្យស្លាប់មនុស្សម្នាក់ និង២នាក់រងរបួស រួមមាន៖ ទី១ ឈ្មោះ ថាប់ សុភក្ត្រ ភេទស្រី អាយុ ៤៥ ឆ្នាំ រស់នៅភូមិសាលាកំរើក សង្កាត់សាលាកំរើក ក្រុងសៀមរាប (ស្លាប់) ។ ទី២ ឈ្មោះ ប៊ូ វន្ថា ភេទប្រុស អាយុ ៤០ ឆ្នាំ រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប (របួសស្រាល)។ ទី៣ ឈ្មោះ លឹម សាចាន់ ភេទស្រី អាយុ ៧៥ ឆ្នាំ រស់នៅភូមិវាល សង្កាត់គោកចក ក្រុងសៀមរាប ( របួសស្រាល)។
របាយការណ៍ដដែល បានបន្តថា ជនរងគ្រោះជាអ្នកដំណើរ ខណៈដែលមេឃកំពុងធ្លាក់ភ្លៀង ពួកគាត់ក៏ចូលទៅជ្រកភ្លៀង នៅក្នុងវត្តចាស់ ភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប ពេលជនរងគ្រោះកំពុងជ្រកភ្លៀង ក៏មានផ្គររន្ទះខ្លាំង ស្រាប់តែរន្ទះបាញ់ត្រូវជនរងគ្រោះទាំង៣នាក់ បណ្ដាលឱ្យម្នាក់ស្លាប់ និង២នាក់រងរបួស។
ប្រភពដដែលបន្តថា ភ្លាមៗប្រជាពលរដ្ឋដែលបានឃើញហេតុការណ៍នេះ ក៏នាំគ្នាជួយសង្រ្គោះបឋមផងដែរ ប៉ុន្តែមិនអាចជួយសង្រ្គោះបាន៕
ដោយ៖សហការី
