សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យពីរនាក់បានធ្វេីសកម្មភាពធាក់ផ្ដួលម៉ូតូរបស់ស្រីស្អាតម្នាក់ហេីយស្រែកគំរាមសម្លុតនិងដកកាំភ្លេីងបាញ់២គ្រាប់បំណងប្លន់យកម៉ូតូពីនារីរូបនេះ ប៉ុន្តែមិនបានសម្រេចក៏ជិះម៉ូតូគេចខ្លួនបាត់ស្រមោលទៅ។
ករណីប៉ុនប៉ងប្លន់ម៉ូតូខាងលេីនេះបានកេីតឡេីងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១១ ខែឧសភា ឆ្នាំ២០២២នេះ នៅចំណុចក្រោយស្ថានទូតចិន ផ្លូវលេខ១៧៦កែងផ្លូវលេខ៤១៨ ស្ថិតក្នុងសង្កាត់ទួលទំពូងទី២ ខណ្ឌចំការមន ។
បើតាមសេចក្តីរាយការណ៍របស់ប្រជាពលរដ្ឋនៅកន្លែងកើតហេតុបានឱ្យដឹងថា មុនពេលកើតហេតុគេឃើញនារីរងគ្រោះជិះម៉ូតូមួយគ្រឿងម៉ាកហុងដាស្គូពី ពណ៌ស ស៊េរីឆ្នាំ២០២០ តាមផ្លូវត្រង់ចំណុចខាងលើ ស្រាប់តែពេលនោះលេចមុខជនសង្ស័យចំនួន២នាក់បានជីះម៉ូតូមកក្បែរ ហើយក៏ធ្វើសកម្មភាពធាក់ផ្តួលម៉ូតូនារីរងគ្រោះ ហើយបាញ់គំរាមចំនួន២គ្រាប់ក្នុងបំណងប្លន់យកម៉ូតូ តែមិនបានសម្រេចឡើយ បង្កឱ្យមានការភ្ញាក់ផ្អើលតែម្តង។
បេីតាមសម្ដីនារីរងគ្រោះសុំមិនបញ្ចេញឈ្មោះ មានវ័យប្រហែល៣០ឆ្នាំ បាននិយាយថា មុនពេលកើតហេតុ រូបគាត់បានជិះម៉ូតូចេញពីកន្លែងធ្វើការ ក្នុងគោលបំណងត្រឡប់ទៅផ្ទះវិញ។ លុះជិះចេញបានបន្តិច ក៏ស្រាប់តែមានជនសង្ស័យ២នាក់ជិះម៉ូតូមួយគ្រឿងមិនចាំម៉ាកមកស្រែកថា «អោយឈប់ៗ» រួចធាក់ផ្តួលម៉ូតូរបស់គាត់ និងបានដកកាំភ្លើងខ្លីបាញ់គំរាមចំនួន២គ្រាប់បំណងប្លន់យកម៉ូតូ តែមិនបានសម្រេចឡើយ ដោយសារតែនៅក្បែរនោះមានក្រុមបុគ្គលិកធ្វើការក្នុងហាងជាច្រើននាក់នាំគ្នាចេញមកមើល ទេីបធ្វេីឱ្យជនសង្ស័យជិះម៉ូតូគេចខ្លួនបាត់ស្រមោលទៅ។
ក្រោយកើតហេតុ កម្លាំងកងរាជអាវុធហត្ថខណ្ឌចំការមនបានចុះទៅកន្លែងកើតហេតុ រួចនាំនារីរងគ្រោះទៅដាក់ពាក្យបណ្ដឹងនៅមូលដ្ឋានកងរាជអាវុធហត្ថខណ្ឌចំការមន ដើម្បីកំណត់មុខសញ្ញាធ្វេីការស្រាវជ្រាវស្វែងរកចាប់ខ្លួនជនសង្ស័យយកមកចាត់ការតាមច្បាប់៕
ដោយ៖ជ្រោយពេជ្រ
