សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ ៖ កម្លាំងជំនាញការិយាល័យប្រឆាំងគ្រឿងញៀនខេត្តព្រះវិហារ សហការជាមួយកម្លាំងអធិការដ្ឋាននគរបាលស្រុកត្បែងមានជ័យ បានចេញបង្ក្រាបបទល្មើសរក្សាទុកដឹកជញ្ជូន ឬ ជួញដូរនឹងប្រើប្រាស់ដោយខុសច្បាប់នូវសារធាតុញៀនមួយករណីដោយគាត់ខ្លួនជនសង្ស័យម្នាក់និងរឹបអូសថ្នាំញៀនមួយកញ្ចប់ធំ។
ការបង្ក្រាបបទល្មើសគ្រឿងញៀនមួយករណីនេះប្រព្រឹត្តទៅកាលពីថ្ងៃទី១២ ខែឧសភា ឆ្នាំ២០២២ វេលាម៉ោង១៦និង ២៤នាទី នៅចំណុចចំការស្វាយស្ថិតក្នុងភូមិក្រាំងដូង ឃុំ ព្រះឃ្លាំង ស្រុកត្បែងមានជ័យ ខេត្តព្រះវិហារ ។
មន្ត្រីនគរបាលបង្ក្រាបបទល្មើសគ្រឿងញៀនខេត្តព្រះវិហារបានឲ្យដឹងថា ក្នុងប្រតិបត្តិការនេះសមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ប៉ោ សំអឿន ហៅ អេង វ៉េងហ័ត ហៅក្រៅ ហ័ត ភេទប្រុស អាយុ២៣ឆ្នាំ ជនជាតិខ្មែរ មុខរបរកសិករ រស់នៅភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ ។ ជាមួយក៏បានរឹបអូសថ្នាំងញៀនប្រភេទម្សៅសថ្លាចំនួន១កញ្ចប់ធំទម្ងន់១២.៤៨ក្រាម និងឧបករណ៍វេចខ្ចប់គ្រឿងញៀនមួយចំនួនផង។
បច្ចុប្បន្នជនសង្ស័យរូបនេះត្រូវបានកម្លាំងសមត្ថកិច្ចជំនាញកសាងសំណុំរឿងបញ្ជូនទៅសាលាដំបូងខេត្តព្រះវិហារដើម្បីចាត់ការតាមច្បាប់៕
ដោយ ៖ ប្រាថ្នា
