សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឱ្យកម្លាំងចម្រុះរបស់អធិការដ្ឋាននគរបាលក្រុងកោះរ៉ុង និងកម្លាំងប៉ុស្តិ៍ទាំង២សង្កាត់ នៅព្រឹកថ្ងៃចន្ទ ១៣កើត ខែអាសាឍ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១១ ខែកក្កដា ឆ្នាំ២០២២ បានចុះផ្សព្វផ្សាយពីអាកាសធាតុតាមការណែនាំរបស់ ក្រសួងធនធានទឹក និងឧតុនិយម ដោយប្រទេសកម្ពុជា នឹងបន្តទទួលរងឥទ្ធិពលពីជ្រលងនៃប្រព័ន្ធសម្ពាធទាប មកពីភាគខាងជេីងប្រទេសជិតខាង ដែលបណ្តាអោយខេត្តជាប់មាត់សមុទ្រ នឹងអាចមានភ្លៀងពីកម្រិតមធ្យម ទៅច្រេីន លាយឡំផ្គរ រន្ទះ ខ្យល់កន្រ្តាក់ ព្រមទាំងរលកសមុទ្រមានកំពស់ខ្ពស់ ។
ជាមួយគ្នានោះ ស្នងការដ្ឋាននគរបាលខេត្តព្រះសីហនុ សូមអំពាវនាវដល់ ម្ចាស់ទូកអាជីវកម្ម ប្រជានេសាទ មានការប្រុងប្រយ័ត្នខ្ពស់ ទាំងប្រព័ន្ធបច្ចេកទេស និងសំភារះសុវត្ថិភាពផ្សេងៗ និងស្តាប់តាមការណែនាំរបស់អាជ្ញាធរមានសមត្តកិច្ចអោយបានខ្ជាប់ខ្ជួន ពិសេសភ្ញៀវទេសចរណ៍ សូមមានការប្រុងប្រយ័ត្នខ្ពស់ ប្រេីប្រាស់អាវពោងទាំងពេលធ្វេីដំណេីរតាមទូកទេសចរណ៍ និងពេលចុះលេងទឹក ព្រមទាំងចៀសវាងកុំទៅលេងដល់ទឹកជ្រៅ។
គួរជម្រាបដែរថា នៅថ្ងៃទី១១ ខែកក្កដា ឆ្នាំ២០២២នេះដែរ លោក គួច ចំរើន អភិបាល នៃគណៈអភិបាលខេត្តព្រះសីហនុ បានណែនាំដល់អាជ្ញាធរពាក់ព័ន្ធទាំងអស់ ត្រូវយកចិត្តទុកដាក់ផ្សព្វផ្សាយអំពីបញ្ហាអាកាសធាតុទៅកាន់ប្រជាពលរដ្ឋដែលត្រូវធ្វើដំណើរតាមផ្លូវទឹកទៅកាន់លំហសមុទ្រ និងប្រជានេសាទដែលកំពុងស្ថិតនៅលើលំហសមុទ្រស្រាប់ ខណៈអាកាសធាតុនឹងអាក្រក់ខ្លាំង ចាប់ពីថ្ងៃទី១១ រហូតដល់ថ្ងៃទី១៤ ខែកក្កដា ឆ្នាំ២០២២៕
ដោយ៖សហការី
