ស្លាប់ម្នាក់របួសធ្ងន់ស្រាល៦នាក់ដោយគ្រោះថ្នាក់ចរាចរណ៍៣កន្លែងផ្សេងគ្នានៅខេត្តស្វាយរៀង

ខេត្តស្វាយរៀង៖ យ៉ាងហោចណាស់បុរសម្នាក់ស្លាប់និងរបួសធ្ងន់ស្រាល៦នាក់ដោយគ្រោះថ្នាក់ចរាចរណ៍៣កន្លែងផ្សេងគ្នានៅក្រុងបាវិត ស្រុករំដួលនិងស្រុកស្វាយទាប។

តាមសមត្ថកិច្ចនគរបាលបានឱ្យដឹងថាករណីទី១បានកើតឡើងកាលពីវេលាម៉ោង៨និង៣០នាទីព្រឹក ថ្ងៃទី១៥ខែ កក្កដា ឆ្នាំ ២០២២ នៅចំណុចលើផ្លូវជាតិលេខ១៣ ស្ថិតក្នុង ភូមិចក ឃុំកំពង់ចក ស្រុករំដួល មានម៉ូតូមួយគ្រឿងម៉ាក ហុងដា សេ១២៥ ស៊េរី ឆ្នាំ ២០២០ ស្លាកលេខ ស្វាយរៀង១P១៩៤៤បើកបរដោយឈ្មោះណន សម្ភស្ស ភេទស្រី អាយុ ២៤ឆ្នាំ រស់នៅ ភូមិបុសស្វាយ ឃុំបុសមន ស្រុករំដួល ខេត្តស្វាយរៀងបានបុកអ្នកដើរថ្មើរជើងមានឈ្មោះ ភោក សឿន  ភេទស្រី អាយុ ៥៨ឆ្នាំ រស់នៅ ភូមិរោងដំរី ឃុំស្វាយចេក ស្រុករំដួល ខេត្តស្វាយរៀងយ៉ាងពេញទំហឹងបណ្ដាលឱ្យរងរបួសធ្ងន់ស្រាល។

សមត្ថកិច្ចបញ្ជាក់ថាមូលហេតុ  ដោយសារតែអ្នកថ្មើរជើងដើរឆ្លងកាត់ផ្លូវខ្វះការប្រុងប្រយ័ត្នទើបមានករណីគ្រោះថ្នាក់ចរាចរណ៍កើតឡើងបែបនេះ។

ករណីទី២ បានកើតឡើងកាលពីវេលាម៉ោង៧និង៣០នាទីព្រឹកនៅថ្ងៃទី ១៥ ខែ កក្តដា ឆ្នាំ ២០២២ លើផ្លូវជាតិលេខ១ចន្លោះគឺឡូម៉ែត្រលេខ ១៤៩-១៥០ ស្ថិតក្នុងភូមិកំពោតជ្រូក សង្កាត់ព្រៃអង្គុញ ក្រុងបាវិត ខេត្តស្វាយរៀង មានម៉ូតូមួយគ្រឿង ម៉ាក HONDA សេ១២៥  ព៌ណខ្មៅ ពាក់ស្លាកលេខ ស្វាយរៀង ១S៣៣៤៩ បើកបរដោយឈ្មោះ ងួន រតនៈ ភេទ ប្រុស  អាយុ ២២ ឆ្នាំ ជនជាតិខ្មែរ មុខរបរ បុគ្គលិកធនាគារ មានទីលំនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង បើកបរពីលិចទៅកើត បានបុកជាមួយម៉ូតូ គ្រឿងទៀត ម៉ាក SCOOPY ពណ៌ខ្មៅ ពាក់ស្លាកលេខ ស្វាយរៀង១P៣៣៧៥ បើកបរដោយឈ្មោះ ម៉ក់ រីណា ភេទ ស្រី អាយុ ១៨ ឆ្នាំ ជនជាតិខ្មែរ មុខរបរសិស្ស មានទីលំនៅភូមិកំពោតប្រស់ សង្កាត់ច្រកម្ទេស ក្រុងបាវិត និងអ្នករួមដំណើរឈ្មោះ រ៉េន សំសុខសុង ភេទ ប្រុស អាយុ ៥ ឆ្នាំ ជនជាតិខ្មែរ មានទីលំនៅភូមិទួលអំពិល សង្កាត់ច្រកម្ទេស ក្រុងបាវិត ខេត្តស្វាយរៀង ក្នុងទិសដៅពីជើងទៅត្បូង គ្មានពាក់មួកសុវត្ថិភាពយ៉ាងពេញទំហឹងបង្កការភ្ញាក់ផ្អើលតែម្ដង។

អ្នករងរបួសធ្ងន់ត្រូវបាន ក្រុមគ្រួសារបញ្ជូនទៅព្យាលបាលនៅមន្ទីរពេទ្យប្រទេសវៀតណាម។

សមត្ថកិច្ចបញ្ជាក់ថាមូលហេតុដោយសារតែម៉ូតូពាក់ស្លាកលេខ ស្វាយរៀង ១P៣៣៧៥ បើកបរឆ្លងកាត់ផ្លូវខ្វះការប្រុងប្រយ័ត្ន។

ករណីទី៣ បានកើតឡើងកាលពីវេលាម៉ោង៨និង១៥នាទីយប់ ថ្ងៃទី ១៤ខែ កក្ដដា ឆ្នាំ២០២២ នៅលើផ្លូវជាតិលេខ១ ចន្លោះគីឡូម៉ែត្រ១៤១-១៤២ស្ថិតនៅភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀងមានម៉ូតូមួយគ្រឿងម៉ាក HONDA DREAM  ពណ៌ខ្មៅ ពាក់ស្លាកលេខ ស្វាយរៀង 1Q-5670  បើកបរដោយឈ្មោះ នុន សារៀ ភេទប្រុស អាយុ៣៨ឆ្នាំ មុខរបរកម្មកររោងចក្រ  និងអ្នករួមដំណេីរឈ្មោះ ម៉ៅ សារៀប៉ុនត្រា ភេទស្រី អាយុ៩ឆ្នាំ មុខរបរសិស្សរស់នៅភូមិបន្ទាយ ឃុំកណ្ដៀងរាយ ស្រុកស្វាយទាបក៏ត្រូវរថយន្តមួយគ្រឿងមិនស្គាល់អត្តសញ្ញាណបានបុកពីក្រោយស្របទិសគ្នាយ៉ាងពេញទំហឹងបង្កការភ្ញាក់ផ្អើលតែម្ដង។

ក្រោយមកអ្នកបើករថយន្តឃើញសភាពការណ៍មិនស្រួល បានបើកគេចចេញពីកន្លែងកេីតហេតុភ្លាមៗ។

អ្នករងរបួសត្រូវបានក្រុមគ្រួសារបញ្ចូនទៅសំរាកព្យាបាលនៅមន្ទីរពេទ្យបង្អែកស្រុកស្វាយទាប ៕

ដោយ៖ យឹម សុថាន